Azərbaycan Respublikası Prezidenti yanında Gənclər Fondunun maliyyə dəstəyi ilə Sumqayıt şəhər Texniki və Təbiət Elmləri Liseyinin tir atıcılıq zalında “Düşmən hədəfindi, Azərbaycan əsgəri!” adlı layihənin birinci turu keçirilib.

Birinci turda ali, orta ixtisas və ümumtəhsil məktəblərin yuxarı siniflərində təhsil alan sumqayıtlı gənclər iştirak ediblər. Tura start verilməmişdən öncə layihə rəhbəri Əli Aslanov tərəfindən layihənin məqsədi, onun keçirilməsinin aktuallığı haqqında iştirakçılara məlumat verilib. Əli Aslanov bildirib ki, respublikamızın ərazilərinin 20% erməni silahlı qüvvələri tərəfindən işğal edilib və bu torpaqların azad olunması, istənilən hallarda düşmən hücumunun qarşısının alınması üçün hər bir azərbaycanlı gəncin silahla davranış və ondan düzgün istifadə qaydalarını bilməsi daha vacibdir.

İştirakçı gənclərə bu qaydaları özündə əks etdirən bukletlər paylanılıb. Bukletlərlə tanışlıqdan sonra yarışa start verilib.

Yarış zamanı iştirakçıların topladıqları xallar qeydə alınmış və birinci turun yekun protokolu tərtib edilib.