Sumqayıt Regional Mədəniyyət İdarəsinə tabeli Abşeron rayon Mədəniyyət Mərkəzi və Fatmayı kənd Diyarşünaslıq klubunun əməkdaşları şəhid ailələrinə baş çəkib, ailənin qayğıları ilə maraqlanıb.
Şəhidimiz polkovnik-leytenant Telman Miriyev 1981-ci ildə Cəlilabad rayonunda anadan olub. Həmin rayonun 2 saylı tam orta məktəbində natamam orta təhsil alıb. Valideynlərinin dəstəyi ilə Telman 1995-ci ildən Cəmşid Naxçıvanski adına hərbi litseydə təhsilini davam etdirib.
T.Miriyev xidmət dövründə dəfələrlə medallarla təltif olunub.
Masallı rayonu ərazisindəki təlim düşərgəsində piyada əleyhinə mina təlimləri keçən zaman ətrafdakı əsgər və digər şəxsi heyəti qorumaq məqsədilə özünü minanın üzərinə ataraq qəhrəmancasına həlak olub.
Digər şəhidimiz Oruc Ramiz oğlu Vəliyev 13 iyul 1998-ci ildə Gəncə şəhərində doğulub. 2001-ci ildə Gəncə şəhər Ə.Cavad adına 2 nömrəli tam orta məktəbdə təhsilə başlayıb. 2012-ci ildə Azərbaycan Silahlı Qüvvələrinin Quru Qoşunlarında xidmət edib.
2020-ci ilin sentyabr ayında Azərbaycan Ordusunda keçirilən hərbi təlimlərə çağrılıb.
2 oktyabr 2020-ci il tarixində Murovdağ istiqamətində yaralı yoldaşını döyüş bölgəsindən çıxarmaq istəyərkən şəhidlik zirvəsinə yüksəlib.
Azərbaycan Respublikası Prezidenti cənab İlham Əliyevin Sərəncamına əsasən O.Vəliyev ölümündən sonra "Vətən uğrunda", "Kəlbəcərin azad olunmasına görə" və "Vətən müharibəsi iştirakçısı" medalları ilə təltif olunub.
Adıçəkilən müəssisələr tərəfindən ailəsi ziyarət olunan digər qəhrəmanımız isə Silahlı Qüvvələr günü anadan olan, Zəfər günü şəhid olan Anar Bahadurov Qubadlıdan Şuşaya gedərkən 30 döyüş yoldaşını ölümdən xilas edərək şəhidlik məqamına ucalıb.
Anar ölümündən sonra Azərbaycan Respublikasının Prezidenti tərəfindən ”Vətən uğrunda”, ”Cəbrayılın azad olunmasına görə”, ”Qubadlının azad olunmasına görə” və "İgidliyə görə” medalları ilə təltif edilib.
Allah bütün şəhidlərimizə rəhmət eləsin!
Xəbərdən istifadə edərkən istinad etmək vacibdir.
