Fransa tərəfi dünən Parisdə Ermənistanla imzalanan hərbi əməkdaşlıq sazişini belə şərh edib: havadan və qurudan dəstək.
Buna uyğun olaraq, Fransa İrəvanı GM200 radiokokasiya stansiyası, "Mistral” qısa mənzilli raketləri ilə təmin edəcək, həmçinin Ermənistanın hava hücumundan müdafiə sistemindəki zəif nöqtələri aşkar etməyə kömək göstərəcək.
Modern.az-ın məlumatına görə, Fransanın müdafiə naziri Sebastyan Lekornyu bildirib ki, Ermənistan özünü və əhalisini qoruya bilməlidir.
Fransız nazir Ermənistanın müdafiə qabiliyyətinin artırılmasına necə kömək edəcəklərini erməni dilində bildirib. O deyib ki, bu məqsədlə Paris tezliklə öz zabitlərindən birini İrəvana göndərəcək. Həmin hərbçi Ermənistan Müdafiə Nazirliyinə məsləhətlər verəcək, dağ şəraitində döyüş vərdişlərini təkmilləşdirmək üçün orta və kiçik rütbəli zabitlərin təhsil müəssisələri ilə işləyəcək.
"Biz eyni hərbi-siyasi ittifaqların bir hissəsi olmasaq da, Ermənistanla müdafiə əlaqələrimizi saxlayırıq. Bu hərbi məsləhətlər bir sadə prinsipə əsaslanır: özünü qorumağı bacarmalısan”, - Sebastyan Lekornyu vurğulayıb.
O, razılaşmanın qiyməti, eləcə də silahların tədarük vaxtı və marşrutlarının hələ bəlli olmadığını bildirib.
Bəs Ermənistana veriləcək silahların hansı imkanları var?
Nazir S.Lekornyu deyib ki, GM200 radar stansiyaları Fransa silahlı qüvvələri və onun hüdudlarından kənarda geniş şəkildə istifadə olunur.
"Biz bu yaxınlarda dəstək paketinin bir hissəsi olaraq bu radarları Ukraynaya satdıq. Bu radarların tamamilə dəqiq yerləşdirmə və analiz imkanları var”, - deyə fransalı nazir bildirib.
Radar sistemini istehsal edən Fransanın "Thales” şirkəti onu döyüş meydanında oyunu dəyişən, havada və yerdəki hədəfləri, o cümlədən pilotsuz təyyarələr və raket sistemlərini aşkar edə bilən silah kimi təsvir edir.
"Bu, çoxfunksiyalı radardır. O, hava hücumundan müdafiəni həyata keçirir və 250 kilometrdən çox radiusda bütün uçan obyektləri aşkar edir. Ancaq bu hamısı deyil. O, bunu son dərəcə dəqiqliklə edir. Radar göydən yerə düşən raket sistemlərini aşkar edə bilir. Üçüncü əsas üstünlük odur ki, o, hərbçiləri raket və artilleriya hücumları barədə xəbərdar edir”, – "Thales”in nümayəndəsi deyib.
Paris Kiyevə iki belə sistem satıb. Postsovet ölkələri arasında Moldova da GM200 radarları alıb. Bu fransız radarları Hollandiya və Norveçlə də xidmətdədir. Açıq mənbələrə görə, bir sistemin təxmini dəyəri 14 milyon avrodur. Eyni mənbələrə görə, sistem quraşdırmadan 10 dəqiqə sonra çox tez aktivləşir.
Dünən tərəflərin də razılaşma əldə etdiyi "Mistral” raketləri hava hücumundan müdafiə üçün nəzərdə tutulub. Ermənistanın nə qədər belə sistem aldığı hələ rəsmi olaraq açıqlanmayıb.
Bu raketlər 8 km-ə qədər məsafədəki hədəfləri vura bilir. Raket istehsalçısının fikrincə, "Mistral” raketləri təxminən 100 faiz dəqiqliyə malikdir və digər qısa mənzilli raketlərdən daha etibarlıdır. Bu halda sövdələşmənin dəyəri də məlum deyil, lakin Fransanın Silahlı Qüvvələr naziri bir neçə ay əvvəl "Mistral” raketlərinin təxminən 500 min avroya başa gəldiyini bildirmişdi.
Qeyd edək ki, rəsmi Bakı Ermənistan-Fransa sövdələşməsini kəskin tənqid edib və bildirib ki, bununla Paris regionda hərbi balansı pozur.
Xəbərdən istifadə edərkən istinad etmək vacibdir.
