Ramazan bayramının başa çatması ilə Türkiyədə koalisiya görüşləri üçün 2-ci tur başlayır. Yeni bir koalisiya hökuməti qurulması üçün artıq Türkiyənin 35 günü qalır. Bu müddət ərzində ölkədə hökumət qurulmasa ölkə prezidenti parlamentin spikeri ilə görüşərək Türkiyədə seçkilərin yenidən keçirilməsinə qərar verəcək.
İyulun 10-da prezident Rəcəb Tayyib Ərdoğan seçkidə ən çox səs toplayan partiyanın – AKP-nin sədri baş nazir Əhməd Davudoğluna hökuməti qurmaq vəzifəsini verib. Davudoğlu isə müvafiq olaraq iyulun 13-də CHP, 14-də MHP və 15-də HDP liderləri ilə görüşərək koalisiyahökuməti qurulması istiqamətinfə müzakirələr aparıb. Müzakirələrdən heç bir nəticə əldə olunmayıb və bundan sonra Türkiyədə ramazan bayramının başlaması ilə görüşlərə ara verilib.
İlk turda ən müsbət görüşün CHP ilə keçirildiyi bildirilir. MHP isə seçkidən sonra səsləndirdiyi bəyanatda olduğu müzakirəzamanı da koalisiya hökumətində ortaqolmaq istəmədiyini bildirib. Buna baxmayaraq Davudoğlu növbəti turda MHP sədri Dövlət Baxçalı ilə bir daha görüşəcəyini deyib.
Xatırladaq ki, iyunun 7-də Türkiyədə parlament seçkisi keçirilib. Parlamentə girməyə müvəffəq olan 4 siyasi partiyanın heç biri tək başına hökumət quracaq qədər millət vəkili əldə etməyib. 550 yerli Türkiyə Böyük Millət Məclisinə AKP 258, CHP 132, MHP və HDP hər biri 80 millət vəkili ilə daxil olub. Təkbaşına hökumət qurmaq üçün bir partiyanın 276 millət vəkilinə ehtiyacı olduğundan hazırda ölkədə koalisiya hökuməti qurulması barədə qızğın müzakirələr gedir.
Artıq Türkiyədə koalisiya hökumətinin qurulması prosesinə start verilib və 45 gün ərzində bu mümkün olmasa ölkədə yenidən parlament seçkisi keçiriləcək. (anspress.com)
Xəbərdən istifadə edərkən istinad etmək vacibdir.
