"Apple” korporasiyası San-Fransiskoda keçirilən "WWDC 2016” konfransı çərçivəsində bir sıra təqdimatlar edib.
İKT.lent.az-ın xəbərinə görə, yenilənmiş "iOS 10” əməliyyat sistemi iştirakçılara nümayiş etdirilib. Dəyişiklik ilk növbədə xəbərdarlıq mərkəzi və ekranın blok sistemi ilə əlaqədardır. Artıq "iPhone” istifadəçiləri xəbərdarlıqları ekranın blokunu açmadan, sadəcə, cihazı əllərinə almaqla görə biləcəklər. "Foto” əlavəsində "ağıllı” çeşidləndirmə alqoritmləri yerləşdirilib ki, onların köməyi ilə bir neçə fotonu vahid albomda birləşdirmək mümkün olur. Digər yenilik "Siri” və "Xəritələr”lə bağlıdır. Proqramçılar bundan sonra "Siri” və "Xəritələr”lə işləyə biləcəklər.
Konfransda kompüterlər üçün yeni "Sierra” əməliyyat sistemi də təqdim olunub. Əgər "iPhone”unuz yaxındadırsa, artıq kompüter və ya noutbuka parol daxil etmək lazım gəlməyəcək. Köhnə dosyelər avtomatik olaraq "iCloud Storage”ə göndəriləcək, kompüterin "iş masası”ndakı istifadə olunmamış (qovluqlardan kənar) fayllar isə "iPhone” ilə sinxronlaşacaq.
Musiqi xidməti "Apple Music”də də yenilik edilib və xidmətin dizaynı tam dəyişdirilib. İstifadəçilər "iOS10”u yükləyərək yeni "Apple Music”i görə bilərlər. İlk ekrana istifadəçinin musiqi kitabxanası yerləşdirilib. Artıq istifadəçilər dinlədikləri musiqinin mətnini də görə biləcəklər.
Bundan başqa, "ağıllı” saatlar üçün "watchOS” platforması da yenilənib. Sistem istifadəçilərə sevdikləri əlavələri daha tez işə salmağa imkan verəcək. Onlar cihazın yaddaşında saxlanacaq və fon rejimində sinxronlaşacaq. Bundan başqa, "watchOS 3”ün öz idarəetmə mərkəzi olacaq. İstifadəçilər həmsöhbətlərinə "ağıllı” mesajlar da göndərə biləcəklər. "Scribbe” adlı sistem mesajlar əlyazma şəklində daxil edilərkən ayrı-ayrı hərfləri tanıyacaq. Bu texnologiya Çin heroqliflərini də dəstəkləyəcək. Digər yeniliyə əsasən bir toxunuşla dostlar və yaxınlarla fitnes sahəsindəki irəliləyişləri bölüşmək mümkündür. "Breathe” əlavəsi isə nəfəs məşqləri ilə stressi götürməyə kömək edəcək. Yeni sistem müxtəlif ölkələrdə təcili xidmətlərlə tez bir müddətdə əlaqə qurmağa da şərait yaradacaq.
Xəbərdən istifadə edərkən istinad etmək vacibdir.
