Sumqayıtın "Daş bazarı” deyilən ərazisində, tikinti materialları satılan bazardan bağlar istiqamətində olan ərazidə daşlardan düzəldilmiş bir daxma var. Bu daxmada 55 yaşlı Nizami Abdullayev yaşayır. Təxminən 2 il bundan öncə onunla həmsöhbət olub dərdini dinləmişdik. Amma o vaxtdan bu yana dəyişən heç nə olmayıb. Əksinə kimsəsiz olan N. Abdullayevin vəziyyəti daha da pisləşib. Bu gün onun komasına baş çəkdiyimizdə səhhətinin ölümcül olduğunun şahidi olduq. Kimsəsiz bu insan dəhşətli xəstəliyə tutulub. Vəziyyət o qədər dözülməz idi ki, çəkilişi belə güclə etdik.

Oradan uzaqlaşdıq və gözlərimizin önündə bir insan taleyinin necə məhv olduğunu gördük. Onunla ilk söhbətimizdən iki il keçib. Amma nə fayda? Aidiyyatı qurumlar isə heç bir addım atmayıb.

Ümidvarıq ki, bəlkə bundan sonra kimsəziz bir insanın taleyinə zərrə qədər də olsa işıq salan tapılar.

Kamran Kazımzadə

Xeberle.com