O, 5 bakal pivə içəndən sonra Kimyaçılar qəsəbəsinə yollanıb.

Bakı Ağır Cinayətlər Məhkəməsində Sumqayıt ş. sakini Kamil Məmmədovun (1985-ci il təv.) CM-nin 120.2.2-ci (xuliqanlıq niyyəti ilə qəsdən adam öldürmə) maddəsi ilə təqsirləndirilməsinə dair cinayət işinin baxışı yekunlaşıb. 

İstintaq materiallarına əsasən, ötən il iyulun 28-də işdən sonra Kamil Məmmədov Sumqayıtda, sürücülük məktəbinin yaxınlığındakı kafedə 200 qram araq və 5 bokal pivə içəndən sonra, təxminən saat 21 radələrində taksiyə minərək yaşadığı Kimyaçılar qəsəbəsinə yollanıb. 

Evinin qarşısında səyyar meyvə-tərəvəz alqı-satqısı ilə məşğul olan qonşusu Rasim Əliyevlə rastlaşıb, ondan evində qarpız olub-olmamasını soruşub. Sonuncu Kamilin bərk sərxoş olduğunu görüb, söylədiyini qeyri-ciddi qəbul etməklə, acıqlı tərzdə "mən qarpız satıram bəyəm" deyə cavab verib. Bu söz Məmmədova pis təsir etdiyindən o taksidən düşüb və Əliyevə yaxınlaşıb kobud və narazı formada danışmasının səbəbini soruşduqda, qonşusu nəlayiq söyüşlər söyüb əl-qol ataraq, onun əynindəki köynəyi dartıb,cırıb. Kənar şəxslərin yanında Rasımın hərəkətlərini özünə qarşı təhqir kimi qəbul edən Kamil öz evinə gedib mətbəxdən bıçağı götürüb, geri qayıdıb və Əliyevə bir-iki zərbə endirib. Ətrafda olan adamlar mane olaraq ona növbəti zərbələri endirməyə imkan verməyiblər. 

Ağır yaralanan Rasim Əliyev xəstəxanaya aparılarkən yolda dünyasını dəyişib. 

Elə həmin gecə Kamil Məmmədov Sumqayıt ş. 2-ci polis bölməsinin əməkdaşları tərəfindən saxlanılıb. Araşdırmalar zamanı onun əvvəllər məhkum olunması məlum olub. 

Məhkəmə prosesində Məmmədov ittiham üzrə özünü qismən təqsirli hesab edib, qonşusuna bıçaq zərbələrini öldürmək məqsədi ilə vurmadığını bildirib. Zərərçəkən Rövşən Əlizadə isə atasını qətlə yetirən şəxsə sərt cəza verilməsini xahiş edib.

Məhkəmənin hökmü ilə təqsirləndirilən şəxs cəzasını ciddi rejimli cəzaçəkmə müəssisəsində çəkməklə 16 il müddətinə azadlıqdan məhrum 
etmə cəzasına məhkum olunub.  (oxu.az)