İyunun 6-da Sumqayıt şəhər stadionunun yeni meydançasında yay futbol düşərgəsi layihəsinin təqdimat mərasimi keçirilib.
Layihə “Sumqayıt” futbol klubunun təşkilatçılığı, “Kapital Bank” və “PAŞA Həyat Sığorta” ASC-lərin sponsorluğu, Təhsil Nazirliyi, Sumqayıt Şəhər Təhsil Şöbəsi, “Azərikimya” İstehsalat Birliyi, AFFA-nın dəstəyi ilə həyata keçirilir.
Futbol klubunun mətbuat xidmətindən AzərTAc-a bildirmişlər ki, 9 gün müddətində 3 qrup üzrə keçiriləcək layihədə Sumqayıtda yerləşən 52 məktəb və liseyin tədris ilində fərqlənən yüzdən artıq oğlan və qız şagirdi iştirak edəcəkdir.
Təqdimat mərasimində “Azərikimya” İB-nin Müşahidə Şurasının sədri, Milli Məclisin deputatı Muxtar Babayev, “Kapital Bank”ın idarə heyəti sədrinin birinci müavini Fərid Məmmədov, marketinq və ictimaiyyətlə əlaqələr departamentinin direktoru Vüsal Nağıyev, “PAŞA Həyat Sığorta”nın idarə heyəti sədrinin müavini Niyaz İsmayılov, Sumqayıt Şəhər Təhsil Şöbəsinin nümayəndələri, Sumqayıt Şəhər İdman və Gənclər baş idarəsinin rəis müavini Mübariz Bəşirov, “Sumqayıt” futbol klubunun prezidenti Kamran Quliyev və s. iştirak ediblər.
Kamran Quliyev qonaqlara yeni inşa olunmuş stadionun inzibati binası barədə məlumat verib.
Sonra qonaqlar məktəblilərlə görüşüblər.
“Sumqayıt” futbol klubunun texniki direktoru Frank Bernhardt yay futbol düşərgəsi layihəsindən danışıb.
Muxtar Babayev layihəyə dəstək verən qurumlara təşəkkür edib.