Azərbaycanda turizm firmalarına müraciətlər artıb. Yay mövsümü ilə tur şirkətlərdə qələbəlik müşahidə edilir. Azərbaycanlılar əsasən Türkiyə, Monteneqro, Yunanıstan və Tailand kimi ölkələrə üz tutur. Şərqi və Mərkəzi Avropa ölkələrinə də səfər edənlər az deyil. Ancaq turizm şirkətlərinə daha çox Antalya, Bodrum, Rodos adası, Kislovodski kimi istirahət zonaları ilə bağlı müraciətlər daxil olur.  Hazırda firmalarda endirim kampaniyaları olsa da, hotellərin səviyyəsi və komforta görə qiymətlər dəyişir. Müxbirimiz öyrənib ki, azərbaycanlıların son aylarda ən çox üz tutduğu məkan Yunanıstanın Rodos adasıdır. Bu möcüzəvi adada bir həftəlik istirahət adambaşı 900 dollar civarındadır.  Monteneqro ilə viza rejiminin ləğvinə baxmayaraq, uçuş xərclərinin bahalığına görə bir həftəlik istirahət adambaşına 800 dollara başa gəlir. Antalya və Bodrumda olan beş ulduzlu otellərdə isə iki nəfərlik 7 gecəlik istirahət 1200 dollardan başlayır. (axar.az)