"Zemfira İsmayılovanın səsi dünyanın nadir səslərindəndir, onu ifaları indiyə qədər dünyanın bir çox konsert salonlarını bəzəyib. Akademik Opera və Balet Teatrının səhnəsində Avropa və Azərbaycan bəstəkarlarının məşhur əsərlərində baş rolların ifaçısı kimi tanınan Zemfira İsmayılova, hazırda Milli Konservatoriyada gənc musiqiçilərə vokal sənətinin sirlərini öyrədir.
Xeberle.com xəbər verir ki, bu sözləri respublikanın Xalq artisti, Milli Konservatoriyanın rektoru Siyavuş Kərimi, ali təhsil ocağında Əməkdar artistin "Arzu” adlı solo konsertində deyib.
Dünya Azərbaycanlılarının Həmrəylik Günü və Yeni il ərəfəsində konsert salonunda öz pərəstişkarlarını bir araya gətirən Zemfira İsmayılova "Arzu” gecəsində məşhur italyan bəstəkarlarının əsərlərindən, eləcə də Azərbaycanın klassik bəstəkarları Fikrət Əmirov, Vasif Adıgözəlov, Tofiq Quliyev, Zakir Bağırovun əsərləri ilə yanaşı, həm də xalq mahnılarını böyük məharətlə ifa edib.
Hər zaman opera və vokal sənətçisi kimi tanınan Z. İsmayılova bu dəfə repertuarına yeni əlavə etdiyi "Girdim yarın bağçasına”, "Qərənfil”, "Mən səni araram”, "Azərbaycan elləri” mahnılarını da səsləndirib.
Konsertin sonunda Zemfira İsmayılova ilə böyük səhnələri bölüşən, Xalq artisti, tanınmış vokalçı Azər Zeynalov sənətkar haqqında xoş sözlər söyləyib: "Mən bütün yaradıcılığım boyu Zemfira İsmayılova ilə böyük səhnələrdə baş rolları oynamışam. Fəxr edirəm ki, Azərbaycanın belə gözəl və nadir səsə malik sənətkarı var. Mən həm də ona görə xoşbəxtəm ki, bu gün də onunla çiyin-çiyinə Milli Konservatoriyada çalışıram”.
Konsert maraqla qarşılanıb.
Xəbərdən istifadə edərkən istinad etmək vacibdir.
