Xəbər verdiyimiz kimi, bu yaxınlarda Daşkəsən rayonunun Xoşbulaq kəndində yaşanan qeyri-insani hərəkət sakinlərin və turistlərin narazılığına səbəb olub.
Xeberle.com modern.az-a istinadən xəbər verir ki, kənd sakinlərindən biri sağlam dişi at və balasını işgəncə verərək öldürüb və yaşayış evlərindən təxminən 150 metr məsafədə quraşdırdığı dirəkdən asıb. Həmin şəxsin məqsədi leş iyinə gələn canavarları ov tüfəngi ilə vurmaq, onların dişini və dərisini satmaqdır. Bildirilir ki, qanunsuz ovla məşğul olan Xoşbulaq sakini öldürdüyü canavarın dişini 200 manata satır.
Bildirilir ki, hələ mart ayından həmin yerdən asılan atların - leş iyindən kənddə yaşamaq olmur. Xoşbulaq sakinlərindən biri kəndə gələn turistlərə bildirib ki, bu "canavar ovçusu"na kənddə "gözün üstə qaşın var",- deyən yoxdur. "Bu oğlan kənddə "at oynadır", əlində silah gəzir. Hamı ondan qorxur. Atların leşi üfunət qoxusu verir, iydən boğuluruq. Kəndə infeksiya yayılır. Atların leşini ordan götürmür ki, noyabrda canavarlar yenə leş iyinə gələcək, bu da onları öldürüb dişini, dərisini, yağını satacaq. Dərdimizi heç kimə deyə bilmirik", - deyə Xoşbulaq sakinlərindən biri deyib.
Xeberle.com olaraq məlumatı dəqiqləşdirmək üçün Daşkəsən rayon icra hakimmiyəti ilə əlaqə saxladıq. İcra Hakimiyyətinin nümayəndəsi Vüqar Məmmədov bildirdi ki, şəkil qışda çəkilib, lakin məlumat dəyişdirilərək yeni xəbər kimi verilib. Əsla bu məlumatdakı kimi deyil. Həmin vətəndaşın qış aylarında özünə məxsus olan atı və onun balasına canavar hücum edərək parçalayıbmış. Kənd sakini canavarın onun digər heyvanlarına da ziyanlıq verməməsi üçün belə üsula əl atıb ki, canavarı tutsun. Məlumatda deyildiyi kimi belə bir vəhşilikdən söhbət gedə bilməz.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
