“Azercell Telekom”un sosial sahədə həyata keçirdiyi növbəti unikal layihəsi olan “Mobil Göz Klinikası” bu gün də uğurla fəaliyyətini davam etdirir.
AZADİNFORM xəbər verir ki, valideyn himayəsindən məhrum olan uşaqlarda göz xəstəliklərinin profilaktikasının aparılması, onların hərtərəfli müayinəsinin təşkilini təmin edən bu layihə, həmçinin, ahılları və aztəminatlı ailələri əhatə edir. Mütəmadi olaraq uşaq və ahıllar evinə səfər edən “Mobil Göz Klinikası”nın həkimləri Lökbatanda yerləşən 39 saylı Kardiorevmatoloji Sanatoriyasında 36 nəfəri müayinə ediblər.
Həmçinin, “Azercell”in Mobil Göz Klinikası Sumqayıtda yerləşən Laçın və Zəngilan rayonlarından olan məcburi köçkünlər üçün sığınacağı ziyarət edərək 36 şəxsi – 31 uşaq və 5 yaşlı insanı müayinədən keçirib.
Qeyd edək ki, iyulun 9-da Klinika Qala qəsəbəsindəki məcburi köçkünləri ziyarət edərək onlar üçün göz müayinəsi aparacaq. Ümumilikdə, layihə çərçivəsində Klinika artıq Bakı şəhərindəki bir çox internat məktəbləri, uşaq evlərinə səfər edib. Gəncə, Lənkəran, Qusar rayonlarındakı kimsəsiz uşaq evlərində, Nabrandakı uşaq düşərgələrində məskunlaşan və Qubadan, Xaçmazdan gətirilən görmə qüsurlu uşaqların müayinələri aparılıb. Təkcə ötən il ümumilikdə “Mobil Göz Klinkası”nda 563 nəfər müayinədən keçib ki, bunun da 519 nəfəri uşaqlar, 44 nəfəri isə yaşlılardı.
Xatırladaq ki, “Azercell” 4 il öncə Mobil Diş Klinikasını da istifadəyə verib. Azərbaycanda çox maraqla qarşılanan və populyarlaşan bu layihədən indiyə qədər 2 mindən artıq uşaq yararlanıb.
Xəbərdən istifadə edərkən istinad etmək vacibdir.
