2020-ci ilin 19-20 sentyabr tarixlərində Azərbaycan Ordusunun keçirdiyi lokal xarakterli antiterror tədbirlərinin nəticəsi olaraq Xankəndi, Xocalı, Ağdərə erməni separatçılardan təmizləndi. Azərbaycanın bütün ərazilərində suverenliyi tam bərpa olundu.
Yəni Qarabağ məsələsi artıq tamamilə öz həllini tapıb. Ancaq Azərbaycan və Ermənistan arasında sülh müqaviləsi hələ də imzalanmayıb. Hazırda sülh danışıqları gedir, lakin nəticə əldə edilməyib.
Oktyabrın sonunda Brüsseldə Ermənistan və Azərbaycan liderləri arasında görüşlər planlaşdırılsa da, danışıqlar baş tutmayıb.
Bəs sülh danışıqları nə vaxt başlayacaq?
Məsələ ilə bağlı danışan sabiq dövlət müşaviri, politoloq Qabil Hüseynli bildirib ki, Sülhyaratma prosesində həm Ermənistanın, həm də Azərbaycanın səyi güclüdür:
"Sülhyaratma prosesi hələ başa çatmayıb. Sülhün bütün müddəaları da razılaşdırılmayıb. Sülhyaratma prosesində həm Ermənistanın, həm də Azərbaycanın səyi güclüdür. Amma bəzən vasitəçilik edən tərəflər, məsələn Avropa Birliyi, Amerika sülhlə bağlı gündəliyə başqa məsələləri də qoşmaq istəyirlər. Bu, əsasən, Azərbaycandan könüllü surətdə köç etmiş Qarabağ ermənilərinə aiddir. Fransa bu məsələdə təhditlə çıxış edib ki, Azərbaycanı tərk etmiş ermənilər hamısı geri qaytarılmalıdır. Biz onların geri qayıtmasına etiraz etmirik. Amma burada olarkən biz onları reinteqrasiyaya dəvət etmişdik. Getməzdilər. Onların iddiası böyük idi. İndi bundan sonra onların geri qayıtması sülhdənkənar ayrıca danışıqlar prosesində həll oluna bilər. Sülh müqaviləsinə daxil edilə bilməz”.
Q.Hüseynli yaxın vaxtlarda Azərbaycanla Ermənistan rəhbərləri arasında görüşün ola biləcəyini deyib:
"Rusiya Moskva görüşünü təklif edir. Ermənistan bununla razılaşmır. Avropa Birliyi də Brüssel görüşünü təklif edir. Mənə elə gəlir ki, Brüsseldəki görüşə həm Azərbaycan, həm də Ermənistan razılıq verə bilər. Konkret vaxt göstərmədən söyləmək olar ki, yaxın vaxtlarda Brüssel xətti ilə Ermənistan Baş naziri Nikol Paşinyan və Azərbaycan Prezidenti İlham Əliyevin görüşü baş tuta bilər.
Görüşün gündəliyi əvvəlcədən iki tərəfə də göndərilir. Məsələn Azərbaycana göndərilən görüş gündəliyinə Azərbaycanın maraqlarına uyğun olmayan ümumi iddialar daxil etsələr, görüş baş tutmayacaq. Gündəlik Azərbaycanı qane edəcəksə, Prezident bu görüşdə itirak edə bilər".
Politoloq Elxan Şahinoğlu isə ilin sonuna qədər liderlər arasında görüşün gözlənmədiyini vurğulayıb:
"Azərbaycanla Ermənistan arasında bu ilin sonuna kimi sülh müqaviləsinin imzalanması ehtimalı çox aşağıdır. Demək olar ki, mümkün deyil.Çünki ilin sonuna iki ay qalıb. Ortada danışıqlar da yoxdur. Dekabrda ATƏT-in ənənəvi görüşü baş tutacaq. Orada yəqin ki, xarici işlər nazirlərinin görüşü olacaq. Ancaq liderlərin görüşü, çox güman ki, ilin sonuna kimi baş tutmayacaq".
E.Şahinoğlu sülh müqaviləsinin imzalanmamasının Azərbaycan üçün narahatlıq yaratmadığını söyləyib:
"Sülh sazişinin imzalanmamasını özümüzə dərd etməməliyik. Azərbaycan üçün bu problem deyil. Zatən böyük bir problemi həll etmişik. Yəni Keçmiş "Dağlıq Qarabağ” problemi həll edilib, torpaqlarımız işğaldan təmizlənib.İndiki zamanda bu, bizə kifayət edir. Sülh müqaviləsinin imzalanmaması Ermənistanı narahat etməlidir. Zəngəzur dəhlizinə bizim marağımız azalıb. Sərhədlərin müəyyənləşməməsi də heç bir narahatlıq yaratmır. Stratejik yüksəkliklər nəzarətimiz altındadır. Amma mümkündür ki, gələn il sülh sazişi imzalansın. Yaxın müddətdə Rus hərbi kontingentini də ərazidən çıxardıq. Biz bu məsələlərlə məşğul olmalıyıq. Quruculuq-bərpa işləri, azərbaycanıların öz dədə-baba torpaqlarına köçməsi üzərində çalışmalıyıq. Yoxsa sülh müqaviləsinin imzalanmasmı bizi narahat etməməlidir". (modern.az)
