Son zamanlar bir çox tədqiqatçılar İŞİD-in istər KİV, istərsə də sosial şəbəkələrdə ən peşəkar metodlarla təbliğ edildiyi, istər İŞİD tərəfindən çəkilən videoroliklərin, istərsə də İŞİD-in PR kampaniyasının əsil Hollivud peşəkarlığı ilə həyata keçirildiyi haqda mütəmadi yazırlar. Bəzən bir KİV tərəfindən ortaya atılmış belə materialı, digər, İŞİD-in mövqeyini qəti olaraq bölüşməyən mətbuat da özü bilmədən tirajlayır. İstəyirik bir məqalənin misalında bu şüuraltı təbliğat metodu haqda oxucularımıza qısa da olsa məlumat verək.
Bir neçə gün öncə Türkiyə mətbuatında "Ankaralı İŞİD-çinin etirafları” adlı bir yazı nəşr olundu. Həmin yazını azərbaycandilli mətbuat da əks edilmişdi. Həmin müsahibə ilə bu linkdən tanış ola bilərsiz.
Bundan sonra deyəcəklərimizi tam hiss edə bilmək üçün öncə bu müsahibəni oxumağınızı, sonra isə bir türk oxucusu kimi ona baxmağa çalışmağı tövsiyə edirik.
İŞİD-çinin bu müsahibəsində oxucuların şüuraltısına yönəlmiş bir neçə birbaşa mesaj var. Və bu mesajlar oxucunu məhz İŞİD-ə qoşulmağa yönləndirən mesajlardır. Bu yazıdan bir müddət sonra oxucuda İŞİD-ə qarşı rəğbət oyana bilər, amma oxucu bu rəğbətin əsil səbəblərini də başa düşməz. İlk növbədə bu mesajların yönləndirildiyi insanlar müəyyən edilib – enerji, seksual ehtiyaclar, azadlıq hissi ilə dolu, hazırda özünü reallaşdırmağa imkan tapmamış gənclər. Sonra da məhz onlar hədəflənib. Çünki ən yaxşı düşüncəsiz döyüşçü də belələrindən çıxır.
Beləliklə yazını oxuyun, sonra bura baxın və aşağıda qeyd edəcəyimiz mesajları özünüz də görəcəksiz:
1. "Biz kürdləri öldürürük, Türkiyə düşmənləri olan kürdləri. Mən cəmi bir nəfər öldürmüşəm, o da Öcalanın fanatı olan türk düşməni kürdü”
2. "Xilafətdə seksual ehtiyacları ödəmək çox rahatdır. Ev var, gedirsən, seçib bəyənirsən, pulunu verib alıb gətirirsən. Olur kənizin. Nə istəyirsən elə, sonra da ya sat, ya bağışla, ya burax getsin. Artıq əziyyət yox”
3. "Suriya və İraqda cavan-cavan gəlinlər özlərini təslim etmək üçün türk döyüşçülər axtarır”
4. "Edam olunan insanlara, ölənlərə bizim də yazığımız gəlir, ürəyimiz ağrıyır. Biz vəhşi deyilik. Biz yalnız Allahın hökmünü həyata keçirmək üçün öldürməyə məcbur oluruq. Onu da Allahın əmr etdiyinə görə. Allahdan daha mərhəmətli olmayacağıq ki?”
5. "İŞİD-ə gedib qoşulub, döyüşüb, adam öldürüb gələnlər üçün Türkiyədə heç bir təhlükə yoxdur. Bütün hüquq mühafizə orqanları bilir, amma heç nə etmirlər. Qorxmayın. Gedib "döyüşüb” doyandan sonra, gəlib həyatınızı yenidən qura biləcəksiz”
Yəqin ki, bu mesajların hər birinin yalan olduğunu söyləməyə və faktlarla təkzib etməyə ehtiyac yoxdur.
Lakin qeyd edək ki, bütün dünya mediasında, müxtəlif dillərdə və müxtəlif ölkələrin gənclərinin psixologiyasına istiqamətlənmiş bu cür şüuraltı mesajlar daşıyan yazılar kifayət qədərdir. Araşdırmalarımızı davam edəcəyik. (ulusinfo.com)
Xəbərdən istifadə edərkən istinad etmək vacibdir.
