Rusiya Hərbi Dəniz Qüvvələrinin komandanı Viktor Çirkov bu ilin sonuna qədər Xəzəryanı dövlətlərin hərbi dəniz qüvvələri və hərbi donanma qüvvələrinin komandanları komitəsinin yaradılmasının müzakirə olunacağını bildirib. Onun bu açıqlaması gündəm yaratmaqla yanaşı, bir çox diqqətçəkici məqamlara yol açıb.

Ümumiyyətlə, son vaxtlar Xəzəryanı ölkələrin Hərbi Dəniz Qüvvələrinin iştirakı ilə keçirilən təlimlərin Rusiya tərəfindən təşəbbüs edilməsinin məhz Kremlin Xəzərdə birgə ordu yaratmaq ideyasına xidmət etdiyinin göstəricisi kimi qiymətləndirilir. Amma Azərbaycan Xəzər dənizi hövzəsində yerləşən ölkələrin iştirakı ilə reallaşdırılan tədbirlərə qatılmağa təcrübə baxımından xüsusi önəm verir və bunu müsbət qiymətləndirir.


Viktor Çirkov - Rusiya Hərbi Dəniz Qüvvələrinin komandanı


Azərbaycan Hərbi Dəniz Qüvvələrinin komandanı vəzifəsini icra edən, Qərərgah rəisi, 1-ci dərəcəli kapitan Şahin Məmmədov bu günlərdə ANS PRESS-ə verdiyi müsahibəsində bildirib ki, biz bütün Xəzəryanı dövlətlərlə hər il növbəti il üçün ikitərəfli beynəlxalq qarşılıqlı əməkdaşlıq planına uyğun olaraq, tədbirlər keçiririk. Təkcə Rusiya ilə deyil, Qazaxıstan, İran, Avropa dövlətləri ilə, Türkiyə ilə qarşılıqlı əməkdaşlığa uyğun tədbirlər reallaşdırırıq. Azərbaycanın Beynəlxalq Hərbi Oyunları çərçivəsində təşkil olunan "Xəzər Dənizi-2015"də iştirakı bunun bir nümunəsi idi.

Onun sözlərinə görə, Xəzər dənizində əməkdaşlığı artırmaq lazımdır. Təhlükəsizlik baxımından yaranan problem istənilən Xəzəryanı ölkəyə həm ekoloji, həm də insan itkisi və s. məsələrədə mənfi təsir göstərə bilər. Ona görə də Azərbaycan Prezidenti, Silahlı Qüvvələrin Ali Baş Komandanı İlham Əliyev 2013-cü ilin sentyabrında Həştərxan Sammitində bir daha təkidlə bildirdi ki, Xəzər dənizi sülh, əmin-amanlıq, qarşılıqlı dostluq dənizi olmalıdır. Prezidentin söylədiyi bu fikri digər Xəzəryanı dövlərlərin başçıları da dəstəklədilər. İndi Xəzəryanı ölkələrin Hərbi Dəniz Qüvvələrinin komandanları bu aspekdən çıxış edərək, qarşılıqlı məlumat bazasının, qarşılıqlı geoqrafiya, noviqasiya xidmətlərinin olması, Xəzərdə gəmilərin təhlükəsizliyi ilə bağlı məsələlərin ümumi həllində qarşıya qoyulan tapşırıqların öhdəsindən gəlməyə çalışır.


Şahin Məmmədov - Hərbi Dəniz Qüvvələrinin komandanı vəzifəsini icra edən


Ş.Məmmədov bir aydan sonra Dövlət Sərhəd Xidmətinin Sahil Mühafizəsinə Rusiya Federal Təhlükəsizlik Xidmətinin sərhədçi gəmilərinin Azərbaycana gəlişinin gözlənildiyini vurğulayıb: "Onlarla birlikdə yüksək səviyyədə hərbi təlimlər keçiriləcək. Bu, digər xarici dövlətin gəmisinin iştirakı ilə ilk beynəlxalq tədbir olacaq. Bundan əvvəlkilər dostluq səfərləri olurdusa, indi ilk dəfə xarici gəmilərin iştirakı ilə belə təlim keçiriləcək."

Hərbi ekspert Üzeyir Cəfərov Xəzərdə birgə ordu yaratmaq ideyasının qorxulu olmadığı qənaətindədir. O ANS PRESS-ə bildirib ki, bu məsələnin təhlükəli ola biləcəyi barədə fikir söyləməkdə çətinlik çəkirəm. Təbii ki, buna vaxt lazım olacaq, qısa müddətdə bunu reallaşdırmaq çətin olacaq. Yəni bunun yaxın perspektivdə bu gözlənilmir. Düzdür, bu günlərdə Sankt-Peterbur şəhərində keçirilən iclasda Xəzəryanı ölkələrlə müəyyən razılaşmalar əldə olunub. Moskvanın bu təşəbbüslə çıxış etməsi başadüşüləndir. Əslində, Rusiya MDB-ni iqtisadi, siyasi cəhətdən yaşatmaq istədiyi kimi, hərbi formada da yaşatmağa çalışır. Xəzərdə vahid ordu yaratmaq ideyası məhz bu məqsədlərə xidmət edir.


Üzeyir Cəfərov- hərbi ekspert

O deyib: "Bu, Azərbaycan üçün heç də qorxulu deyil, əksinə, burada böyük təcrübə qazanmaq mqmkündür. Çünki hazırda Xəzərdə ən böyük güclü hərbi donanma Rusiyaya aiddir. Bu günlərdə keçirilən "Xəzər Dənizi-2015" müsabiqəsi bunu bir daha göstərdi. Burada Azərbaycandan sonra Qazaxıstan Hərbi Dəniz Qüvvələri üçüncü oldu. Yəni Rusiya tərəfindən yaradılması nəzərdə tutulan hərbi donanma qüvvələrinin komandanları komitəsində Azərbaycanın təmsil olunması təcrübə baxımından çox faydalı olar."

Hərbi ekspert Rusiyanın vahid ordu ideyasının keçmiş SSRİ-ni bərpa etmək anlamına gəlməsi fikrinə qarşı olduğunu söyləyib: "Son vaxtlar bununla bağlı müxtəlif fikrilər səsləndirilir. Amma mən bunu real saymıram. Çünki indiki vaxtda SSRİ-ni bərpa etmək mümkün deyil."

Bildirək ki, avqustun 13-də Rusiya Xəzər Dəniz Donanmasınıni "Mahaçqala" və "Volqodonsk" kiçik artilleriya gəmiləri, həmçinin "Anatoliy Qujvin” kiçik hidroqrafiya gəmisi Bakı sahillərinə yan alıb. Rusiya hərbi gəmilərini Azərbaycan Respublikası Hərbi Dəniz Qüvvələrinin və Rusiya Federasiyasının ölkəmizdəki səfirliyinin nümayəndələri qarşılayıblar. Avqustun 16-dək davam edəcək səfər çərçivəsində gəmilərin şəxsi heyətinin mədəni və tarixi abidələrlə tanışlıq məqsədilə Bakıda gəzintisi, həmçinin futbol üzrə yoldaşlıq görüşü planlaşdırılıb.


Rus hərbi gəmisi

Rus dənizçiləri Bakıda qarşılanır