Azərbaycan Kinematoqrafçılar İttifaqının sədri, yazıçı-dramaturq, Milli Şuranın fəxri sədri Rüstəm İbrahimbəyovla bağlı sözün əsl mənasında şok effekti yaradacaq məlumat əldə etmişik. 75 yaşlı sənət xadimi şəxsi həyatı, ailəsi ilə bağlı bilgiləri ictimaiyyət üçün nə qədər sirr saxlamağa çalışsa da redaksiyamıza daxil olan bir məlumat İbrahimbəyovun planlarını alt-üst etdi. 

İbrahimbəyov ömrünün ahıl yaşında gənclik xəyallarından, eşq macəralarından, sevgi oyunlarından əl çəkmir. Bir neçə dəfə ailə həyatı quran rejissorun, sən demə, hamıdan gizli ailəsi də var imiş. Yəqin ki, çoxları İbrahimbəyovunhamıdan gizlətdiyi 8 yaşlı oğlundan, İsmayıllının İvanovka kəndindəki dəbdəbəli Villasından və gənc həyat yoldaşından xəbərsizdir. 

İbrahimbəyovun qeyri-rəsmi nikahda yaşadığı şəxs Lalə Əfəndiyeva adlı xanımdır. O, Azərbaycan Kinematoqrafçılar İttifaqının üzvü, 2009-cu ildə “Şərq-Qərb” Bakı beynəlxalq kinofestivalının keçirilməsi üzrə səlahiyyətli nümayəndə olub. Demək olar ki, Kinematoqrafçılar İttifaqında İbrahimbəyovun “sağ əli” funksiyasını yerinə yetirən Lalə Əfəndiyevanın adı xatırlayırsınızsa təşkilata qarşı yönələn vergi cinayətində hallanırdı. Hətta Vergilər Nazirliyinin Vergi Cinayətlərinin İbtidai Araşdırılması Departamenti Lalə Əfəndiyevaya Cinayət Məcəlləsinin 179.3.2-ci maddəsi ilə ittiham elan etmişdi.(Cinayət Məcəlləsinin bu maddəsi mənimsəmə və ya israf etmə, yəni təqsirkara etibar edilmiş özgə əmlakını külli miqdarda talanması haqqındadır. Bu maddə əmlakı müsadirə olunmaqla və ya olunmamaqla 7 ildən 12 ilədək müddətə azadlıqdan məhrumetmə cəzası nəzərdə tutur – red). 



Lalə Əfəndiyeva hətta haqqındakı ittihamlarla bağlı bir dəfə istintaqa ifadə də vermişdi. “Vergi nümayəndələri iddia edirlər ki, 2009-cu ildə keçirilən “Şərq-Qərb” kino festivalı zamanı Azərbaycana gəlmiş 125 nəfər qonaq ölkədə piyada gəzib. Bu, tamamilə əsassız iddiadır. Çünki qonaqları gəzdirmək üçün firma ilə müqavilə bağlanıb, ödənişlər edilib, qəbzlər alınıb. Bunu sübuta yetirən bütün sənədlər, video lentlər var, hətta avtomobillərin nömrələri də foto və video kadrlara düşüb. İndi bizə deyirlər ki, həmin avtomobilləri, onların sürücülərini də tapın. Biz də avtomobillərin bir neçəsini tapmışıq. Bu istiqamətdə araşdırmalarımız davam edir”-deyə adı çəkilən xanım mətbuata açıqlamasında bildirmişdi.

Əfəndiyeva və İbrahimbəyov cütlüyü aralarında illərdir davam edən özəl münasibətləri gizlətsələr də, onların yaxınları, adlarının çəkilməsindən ehtiyat edən sənət xadimləri bu ailənin varlığından xəbərdar olduqlarını etiraf etdilər.

Cütlüyün eşq macərəları elə Kinematoqrafçılar İttifaqından başlayıb. Təxminən 10 il bundan öncə, bəlkə də çox-çox əvvəl. Əvvəl sadəcə iş yoldaşı olan Əfəndiyeva və İbrahimbəyovun əlaqələri qısa zaman kəsiyində sevgi müstəvisinə keçib. Tərəflər arasında sıx bağlılıq yaranıb. Keçmiş həyat yoldaşı ilə yolları ayrılan Lalə xanım İbrahimbəyovla qeyri-rəsmi ailə qurmağa qərar verir. Halbuki, bundan öncə onların hər ikisi ailəli olmuşdular. Bu “ailə” Lalə xanımın ikinci baharı olsa da İbrahimbəyovun isə bəlkədə sayını unutduğu baharı idi. 

Yuxarıda qeyd etdiyimiz kimi, İbrahimbəyovun İvanovka kəndindəki villasında hazırda Lalə Əfəndiyeva və onun oğlu yaşayır. 

Kəndə yolumuz təsadüfən düşsə də, Əfəndiyeva və İbrahimbəyov cütlüyü haqda maraqlı məlumatlar əldə etdik. Əfəndiyevanın malakan qonşuları da AzVision.az-a yuxarıdakı məlumatları təsdiq etdilər. Onlarla söhbətimizdə bəlli oldu ki, İbrahimbəyov İvanovkadakı evini təxminən 4-5 il bundan öncə alıb. Yay mövsümündə Lalə xanım və oğlu Fərhadla birgə gələrək dincələmişlər. Ta ötən ilə kimi.. 

İbrahimbəyovun İvanovkadakı qonşularının sözlərinə görə, kənd əhalisi onları ər-arvad kimi tanıyırlar. Hətta yeni qonşuları ilə tanışlıq vaxtlarında Lalə xanım özünü Rüstəm İbrahimbəyovun həyat yoldaşı kimi tanıdıb.



Qısa vaxtda qonşuları ilə mehriban təmaslar quran xanım keçmiş həyat yoldaşı, ilk ailəsi haqda da onlarla dərdləşib, başından keçən olayları danışırmış.

“Lalə xanımı artıq bir neçə ildir tanıyırıq. O, Rüstəm müəllimin həyat yoldaşıdır. 4-5 il olar ki, bizim kəndimizdə ev alıblar. Burada daimi yaşamasalar da, yaydan-yada gəlib, dincəlirlər. Bir ildən çoxdur ki, Rüstəm müəllim bura gəlmir. Onlar bəzən axşamlar küçəyə çıxaraq gəzişib, insanlarla söhbətləşirdilər”,- deyə İvanovka sakinləri cütlüklə bağlı təəssüratlarını AzVision.az-ın əməkdaşı ilə bölüşüblər. 

Lalə xanım onlarla söhbəti zamanı birinci ərinin içki aludəçisi olduğundan şikayətlənib. Buna görə də yola getmədiklərini, ayrıldıqlarını qonşularına deyib.

Bəs, Fərhad kimdir? 

Fərhad - Lalə Əfəndiyevanın və İbrahimbəyovun oğludur. Ən azından Lalə xanım həmsöhbətlərinə belə deyib. Fərhadın təxminə 8-9 yaşı var. Paytaxt məktəblərinin birində ikinci sinifdə oxuyur.
Azyaşlı Fərhad Bakıda doğulub-böyüsə də, kənddə özünü çox mehriban və sadə aparır. Yay tətilini İvanovkada keçirən Fərhad həmyaşıdları ilə oynayır, söhbətləşir. Özünü yad kimi aparmır.

İbrahimbəyova yaxın şəxslərdən biri də AzVision.az-a açıqlamasında Fərhadın onun oğlu olduğunu gizlətməyib. Bildirib ki, İbrahimbəyov bunu hamıdan gizlətməyə çalışır.

Qocaman sənət xadiminin hamıdan gizlətdiyi oğlunun soyadının İbrahimbəyov, yaxud Əfəndiyev olmasını dəqiqləşdirə bilmədik. Yəqin ki, onların münasibətləri qeyri-rəsmi olduğu üçün övladları Əfəndiyevanın soyadını daşıyır.

İbrahimbəyov Azərbaycanda olmasa da, “ailəsinin” aylıq dolanışığı üçün pul göndərir, onların problemləri ilə maraqlanır. Kənd sakinlərinin sözlərinə görə, Lalə Əfəndiyeva və oğlu maddi baxımdan heç də kasıb deyillər, əksinə, dəbdəbəli ev, bahalı geyimlər onların xoş güzəranından xəbər verir. 

Gördüyünüz kimi, bundan öncə iki dəfə ailə quran İbrahimbəyovun gizli həyat yoldaşı və 8 yaşlı oğlu var imiş.

Qeyd edək ki, 1939-cu fevralın 5-də Bakıda anadan olan İbrahimbəyovun ilk həyat yoldaşı Şöhrət İbrahimbəyovadır. Onların münasibətlərindən 31 mart 1972-ci ildə oğlanları Fuad dünyaya gəlib. Fuad İbrahimbəyov hazırda Rusiyada yaşayır və ssenarist-rejissordur.

Rüstəm İbrahimbəyov ikinci evliliyində S.Vurğun adına Rus Dram Teatrının aktrisası, Azərbaycanın xalq artisti Lyudmila Duxovnaya ilə ailə həyatı qurub. 1944-cü il təvəllüdlü Lyudmila xanım 1963-cü ildən ta bu günə kimi Bakıdakı Rus Dram Teatrının aktrisasıdır.

İbrahimbəyovun ikinci həyat yoldaşı Səməd Vurğun adına Rus Dram Teatrının aktrisası, Azərbaycanın xalq artisti Lyudmila Duxovnayadır. İbrahimbəyovun ikinci evliliyindən isə bir qızı dünyaya gəlib. Fatimə İbrahimbəyova 1974-cü ildə anadan olub. O, Rusiyada Dövlət Kinematoqrafiya İnstitutunu bitirib, bir müddət “Azərbaycanfilm”də işləyib və hazırda həyat yoldaşı və 3 oğlu ilə İstanbulda yaşayır. (azvision.az)