"Forbes” jurnalında Azərbaycan ilə Ermənistan arasında baş vermiş 44 günlük müharibədən bəhs edən məqalə dərc olunub.
Xeberle.com xəbər verir ki, müəllif Pol İddon məqalədə Ermənistan-Azərbaycan Dağlıq
Qarabağ münaqişəsindən, Ermənistan tərəfindən ərazilərimizin 20
faizinin işğala edilməsindən, bir milyondan çox azərbaycanlının qaçqın
və məcburi köçkünə çevrilməsindən, xüsusilə də Azərbaycanın 44 günlük
Vətən müharibəsində qazandığı şanlı Qələbədən söhbət açıb.
Müəllif
vurğulayır ki, bu qısamüddətli müharibə Azərbaycanın parlaq qələbəsi və
Ermənistanın sarsıdıcı məğlubiyyəti ilə başa çatıb. Azərbaycan
Ordusunun cəbhədə düşmənə endirdiyi sarsıdıcı zərbələr və qazandığı
böyük uğurlar Ermənistanı noyabrın 9-da Rusiyanın vasitəçiliyi ilə
məğlubiyyətinə dair bəyanatı imzalamağa, işğal altındakı bütün
torpaqlardan qoşunlarını çıxarmağa məcbur edib.
İddon
yazır ki, 2020-ci ildə Qarabağ uğrundakı son müharibə zamanı ən müasir
silah və hərbi texnika ilə təmin olunmuş Azərbaycan Ordusu Ermənistan
silahlı qüvvələrini ağır məğlubiyyətə uğradıb. Bununla da Azərbaycan
Ordusu pilotsuz uçan aparatlardan, eləcə də müasir hərbi texnologiyadan
məharətlə istifadə etməklə, kiçik dövlətlərin döyüş meydanında üstünlüyü
necə ələ almasını əyani şəkildə göstərib.
Məqalədə qeyd edilir
ki, 2020-ci ildə Qarabağ müharibəsi başlayarkən bir çox erməni
hərbçilər 1994-cü il Qarabağ müharibəsində qazandıqları müharibəyə
bənzər döyüşlər gözləyirdilər. Əsasən Rusiya istehsallı silahlarla
təchiz edilmiş Ermənistan ordusu bu müharibədə də üstünlük qazanacağını
və ya ən azından uğurla müdafiə olunacağını düşünürdü. Lakin 44 günlük
müharibə zamanı Ermənistan silahlı qüvvələri özünü gələcəyin
müharibəsinə uyğun hazırlamış Azərbaycan Ordusu tərəfindən darmadağın
edildi.
Məqalədə Azərbaycan rəhbərliyinin ölkədə apardığı böyük
ordu quruculuğu, müasir müdafiə sənayesinin yaradılması ilə yanaşı,
İsrail və Türkiyədən aldığı müasir silah-sursatlar barədə də ətraflı
məlumat verilir. Bildirilir ki, müasir hərbi vasitələrə malik olmayan
Ermənistan ordusu böyük və sarsıdıcı məğlubiyyətə uğradı. Müəllif,
həmçinin Ermənistanın hava hücumundan müdafiə (HHM) sistemlərinin məhv
olunmasında Azərbaycan PUA-larının xüsusi rol oynadığını diqqətə
çatdırır.
Azərbaycan Prezidenti İlham Əliyevin müharibə
zamanı xarici mətbuata verdiyi müsahibələrindən birində səsləndirdiyi
fikrə istinad edən müəllif vurğulayır ki, müharibə zamanı Türkiyə
istehsalı olan pilotsuz uçuş aparatları ilə bir milyard dollar dəyərində
olan erməni hərbi texnikası məhv edilib.
İddon rəsmi
statistikaya əsaslanaraq, Vətən müharibəsi zamanı təxminən 240 erməni
tankının məhv edildiyini, 40-a yaxın tankın və 20-dən çox piyadaların
döyüş maşınının Azərbaycan Ordusu tərəfindən qənimət olaraq ələ
keçirildiyini bildirir.
Sonda müəllif bir daha
vurğulayır ki, 44 günlük Vətən müharibəsi Ermənistanın məğlubiyyəti ilə
nəticələnib və tərəflər Rusiyanın vasitəçiliyi ilə Ermənistan
qoşunlarının Azərbaycan ərazisindən çıxarılmasına dair bəyanat
imzalayıblar. Qazandığı şanlı Zəfərlə Azərbaycan XXI əsrdə kiçik
dövlətlərin ən müasir və yüksək keyfiyyətli silah və hərbi sistemlərdən
səmərəli istifadə etməklə, hərb meydanında qələbə əldə edə biləcəklərini
sübuta yetirdi.
Xəbərdən istifadə edərkən istinad etmək vacibdir.
