"Ötən günlərin birində qızım - 3 yaşli Dənizin ehtiyyatsızlıqdan qolu zədələndi. Sumqayıt şəhər Təcili Tibbi Yardım Xəstəxanasının Travmatologiya şöbəsinə apardıq. Əvvəlcə "Rentgen”müayinəsindən keçirdilər. Bildirdilər ki, qolu dirsək nahiyəsindən çıxıb. Travmatoloq Şəhrur İsmayılov uşağı müayinə etdi. 5 manat "Rentgen” üçün, 6 manat isə zəhmət haqqı aldı. Və bizi evə göndərdi.”
Bu sözləri Xeberle.com-a Sumqayıt şəhər sakini Asudə Muradova deyib. A. Muradova elektron ünvanımıza göndərdiyi məktubda həkimin işinə laqeyd yanaşmasından şikayətlənir: "Amma saatlar keçdikcə uşağın qolundakı ağrılar daha da kəskinləşdi. İş o həddə çatdı ki, nənəsi qonşuluqda olan (sınıqçı) qadına müraciət edib. Evə gələn qadın uşağın qolunun dirsəkdən deyil, əksinə bilək və çiyin nayihələrdən cıxdıgını bildirib.Və türkəçarə üsulla cıxan qolu yerinə salib. Uşaq yalnız bundan sonra, özünə gəlməyə başlayıb.”
A.Muradova yazır ki, növbəti gün iradını həkimə bildirmək üçün şöbəyə gedib və gözləmədiyi situasiyayla qarşılaşıb: "Bu zaman Şəhrur İsmayılovun acı rəftarı və həkimə yad olan böhtanı ilə üzləşdim. O, uşağın nənəsinə "-Mən o qolu salmışdım, siz sonradan çıxartmısınız" kimi məntiqsiz cavab verib. Həkim üstəlik məsələnin mahiyyətini ortaya qoyan və məsuliyyətsizliyinin isbatı olan "Rentgen” müayinəsinin nəticələrini də gizlədib”.
Təəssüflər olsun ki, demək olar ki, bu kimi hallar hər gün baş verir və həlli istiqamətində heç bir addım atılmır.
Həkimin ünvanına səslənən iddialarla bağlı mövqeyini işıqlandırmağa hazırıq.
Xeberle.com
Xəbərdən istifadə edərkən istinad etmək vacibdir.
