Son vaxtlar Sumqayıtda bəzi işbazlar yaşıllıqları məhv edirlər, min bir əzab-əziyyət bahasına başa gəlmiş ağacları gecəylə kəsirlər. Bu yaşıllıqları məhv edən sumqayıtlı ola bilməz, ya da onun qanında sumqayıtlı qanı yoxdur. Olsa belə iyrənc əməllərə əl atmaz. Bu şəhər bizimdir, biz sumqayıtlıların. Unutmayaq, bu şəhər bizimdir və havasını hər birimiz, hər birimizin ailəsi, uşaqları udur. Ekoloji balansın qorunması hər birimizin borcu olmalıdır. Ən azı ona görə ki, bizdən sonra gələn nəsillər bizə lənət oxumasın!

Sumqayıtın "alleyka”larında hər birimizin uşaqlıq, gənclik xatirələri yaşayır. Və göz görə-görə Sumqayıtın memarlıq və şəhərsalma qaydalarının pozulması ilə müşayiət olunan bu xiyabanların zəbt olunması çox ürəkağrıdıcıdır.

 Üstəlki indi Sumqayıtda hara baxırsan ya qazırlar, ya da nə isə tikirlər. Nə axtarırlar, yol idarələrinin işçiləri heç özləri də bilmirlər. Bu gün asfatlayır, iki gündən sonra dağıdırlar. Niyə? Demə, asfalt döşəyərkən telefon xətlərini zədələyiblər, "Təcili yardım"a zəng vuran polisə düşür, teatra zəng vuran hamama. 

Asfalt dağıdılır, telefon xətləri səliqə-sahmana salınır, həmin hissə yenidən asfaltlanır. Sabahı gün həmin yerdən keçəndə yenə də fəhlələrin asfaltı dağıtdıqlarını görürsən. Yaxşı, indi nolub? Bu dəfə də kanalizasiya xətti tutulub. Dağıdırlar, kanalizasiyanı açırlar, təkrar asfaltlayırlar. 

İki gündən sonra yenə də asfalt dağıtma işinə girişirlər. Elə də olur ki, fəhlələr bir yeri qazıb-dağıtmaqdan bezir, "lopatka"nı belə asfaltın altında qoyub gedirlər. Amma bizim asfalta da etibar yoxdur. Bir balaca yağış yağan kimi də dağılır və adamın bütün paxırını ortaya qoyur. Və bir də görürsən ki, küçənin tən ortasında asfaltın altından "lopatka" çıxır.

Sözüm onda yox keçək əsas mətləbə. Bu yaxınlarda Sumqayıt şəhərində mərkəzi küçələrdən biri olan Sülh küçəsinin asfalt örtüyü yenidən dəyişdirildi. Baxmayaraq ki, bu küçənin asfalt örtüyünün dəyişməsinə ehtiyac yox idi. Əvəzində isə illərlə asfalt döşənəcəyini gözləyən küçələr, məhəllərarası yollar var. 

Üstəlik Sülh küçəsinə asfalt döşənəndən sonra bu gün yenidən ərazidə təmir işlərinə başlanılıb. Ərazidə işləyən fəhlələr də gözə dəymirdi ki, burada nə iş görüldüyü barədə məlumat əldə edək. Lap yaxşı dəyişin, yeniləyin, amma. Əmması odur ki, bunu əvvəlcədən etmək olmazdımı? Asfalt döşənməmişdən öncə edə bilməzdinizmi?

Lap paytaxtın meri Hacıbala Abutalıbovun dillər əzbəri olan yarızarafat yarıgerçək sözləri yada düşdü. Əvvəl asfaltlayaq, sonra qazıb yenidən asfaltlayarıq. Adət-ənəni pozmayaq!

Təəssüf ki, bu reallıqdır.

R.ZEYNALLI