Bu gün xəbər aldıq ki, "Sumqayıt" rəhbərliyi Aqil Məmmədovu istefaya göndərdi. Əslində, "Sumqayıt" cari mövsümə çox pis başlamışdı. Geridə qalan 7 turda komandanın aktivində 1 qələbənin belə olmaması dediklərimizin sübutudur. Aydın məsələdir ki, Sumqayıtın komandasında ciddi dəyişikliyə ehtyac var. Klub 5 mövsümdür davam edən strategiyasına da əl gəzdirməlidir. Bəlkə də klubun strukturunda da dəyişikliklər etmək olar, lap elə idarəetmə işinə yeni simaların, "baş”ların gətirilməsi də faydalı olardı. Bu klub hər zaman idarəetmə sistemində demokratik atmosferin bərqərar olunması ilə maraqlı olub və yadda qalıb. Hər halda klublarda Müşahidə Şurasının yaradılması ilə bağlı qərar olmamışdan bu şuranı yaradan ilk klub "Sumqayıt” olub.

Yeri gəlmişkən, bu günlərdə "Sumqayıt" klubunun prezidenti Kamran Quliyev deyib ki, AFFA-nın İcraiyyə Komitəsinin klublarda Müşahidə Şurasının yaradılması ilə bağlı qərarı var. Biz bu Şuranı yaradan ilk klub olmuşuq. Klubda struktur dəyişikliyi ilə bağlı hazırda müəyyən sənədləşmə işləri aparılır. K.Quliyev bildirib ki, struktur dəyişikliyi olacaq və hazırda klub bu istiqamətdə iş aparır: "Digər klublardakı kimi, bizdə də prezident postu ləğv olunacaq və icraçı direktorla əvəzlənəcək. Mən indi "Sumqayıt"ın həm prezidenti, həm də baş direktoruyam. Sənədlərdə belə gedir. Sadəcə, prezident vəzifəsi ləğv olunacaq. Müşahidə Şurası özü icraçı direktor təyin edəcək və onun işinə qiymət verəcək".

Bir müddət əvvəl AFFA-nın baş katibi Elxan Məmmədov "Sumqayıt" klubunda struktur dəyişikliyinin olacağını demişdi.

Xatırlayırsınızsa, cari ilin mart ayının 31-dən etibarən AFFA prezidenti Rövnəq Abdullayev "Neftçi" İdman Sağlamlıq Cəmiyyətinin yaradıldığını, Müşahidə Şurasının da həmin qurumun tərkibində əsas idarəedici qüvvə olaraq fəaliyyət göstərəcəyini, ən əsası, xalq yazıçısı Çingiz Abdullayevin şuranın sədri, rejissor və aktyor Bəhram Bağırzadə, futbol veteranları Səməd Qurbanov, Mübariz Zeynalov, SOCAR-ın vitse-prezidentinin müavini Cəbrayıl Məmmədov, "Neftçi"nin sabiq prezidenti Sadıq Sadıqov və SOCAR-ın Sərmayələr İdarəsinin rəis müavini Zaur Qəhrəmanovun şuranın üzvləri təyin olunduğunu elan etmişdi.

Bəli, "Neftçi” klubunun Müşahidə Şurasının idarəçiliyi əsl futbol adamının əlində deyil. Amma üzvlər arasında Azərbaycan futbolunun dəyərli simaları yer alıb. İndi isə "Sumqayıt" klubunun Müşahidə Şurasının üzvləri və sədri ilə tanış olaq:
Milli Məclisin deputatı, "Azərikimya" İstehsalat Birliyinin Müşahidə Şurasının sədri – Muxtar Babayev, Milli Məclisin deputatı – Hacı Salayev, Sumqayıtın İcra Başçının müavini – İctimai-siyasi və humanitar məsələlər şöbəsinin müdiri – Elgün Həbibullayev, "Paşa Həyat Sığorta” ASC-nin İdarə Heyətinin sədri – Mürsəl Rüstəmov, "Azərikimya” İB-nin Həmkarlar İttifaqı Komitəsinin sədri - Vaqif Ömərov, Əməkdar Bədən Tərbiyəsi və İdman Xadimi – Telman Salahov... Gördüyünüz kimi bu siyahıda yazıçı, yaradıcı şəxs adına rast gəlinmir. Elə isə, niyə də "Sumqayıt” klubunda belə keyfiyyət dəyişiklikləri olmasın?! Hər halda Sumqayıt şəhərində də kifayət qədər yaradıcı insan yaşayır, fəaliyyət göstərir. Bəli, Çingiz Abdullayev və Bəhram Bağırzadə hər zaman "Neftçi”nin sadiq azarkeşləri kimi diqqət çəkiblər. Elə isə Sumqayıtda da futbolla nəfəs alan dəyərli ziyalılarımız, yaradıcı şəxslərimiz var. Birini ürəklə misal çəkə və təklif edə bilərəm: yazıçı, publisist və jurnalist Varis Yolçiyev.

Varis son illər Azərbaycanda ən çox oxunan, qısa zamanda populyarlaşan yazıçıya çevrilib. Onu hələ "168 saat” qəzetinin baş redaktoru olan dövrlərdən yaxşı tanıyırıq. Bilməyənlər üçün deyim ki, o Sumqayıt şəhərindəndir: orada doğulub və boya başa çatıb. Onun ədəbiyyat sahəsində uğurları haqqında uzun-uzadı danışmaqla sizi yormaq istəmirəm. Sadəcə bu 5 məqama diqqət yetirməyiniz kifayətdir:

- Azərbaycan hökümətinin "Qızıl Kəlmə” ali ədəbiyyat mükafatının sahibi

- Avrasiya Yazarlar Birliyinin ödülçüsü

- Rusiya Federasiyasının Yazıçılar Birliyinin "İlin yazıçısı” müsabiqəsinin diplomantı

- Azərbaycanda 9, Türkiyədə 3, Özbəkistanda 2, Rusiya və Kanadanın hər birində 1 kitaqbı çıxmış yazıçı

- Azərbaycan Respublikası Yazıçılar Birliyinin komissiya üzvü, Rusiya Federasiyasının Yazıçılar Birliyinin üzvü, həmçinin İWU-nun (Beynəmiləl Yazıçılar İttiaqı) üzvüdür.

Qeyd etdiyim ki, Varis qatı futbol azarkeşidir və hər zaman Sumqayıt futbolu üçün canının yandığının şahidi olmuşam. Onun hətta futbolla bağlı gözəl ideyaları, iti qələmi var. Bu yaxınlarda Azərbaycan futbolunun canlı əfsanəsi Nazim Süleymanov haqqında yazdığı kitab çox şeydən xəbər verir. Bu kitab qısa zamanda futbol istimaiyyətinin və oxucu auditoriyasının geniş marağına səbəb oldu.

Bəli, "Neftçi”də bakılı Çingiz Abdullayev, "Sumqayıt”da sumqayıtlı Varis Yolçuyev, sədr də olmasa, şuranın üzvlərindən biri qismində. Hər halda üzvlüyə çox uğurli bir namizəddir Varis. Niyə də olmasın?! Məncə, sınamağa dəyər.

Sumqayıt klubu son 7 oyuna qələbə qazanmasa da, komandanın ev oyunlarında tribunaar ağzına qədər dolu olur. Çünki bu şəhərdə futbolu sevirlər. Azarkeşlərin də haqqı var ki, qarşısında heç olmasa 5-ci yerə oynayan komanda görsün. Ümidvarıq ki, yeni ciddi keyfiyyət dəyişiklərindən sonra "Sumqayıt” turnir cədvəlində, Azərbaycan futbolunda layiq olduğu yeri tutacaq.

Elnur Ağayev