Abşeron-Xızı Regional Təhsil İdarəsi tərəfindən indiyə qədər Xeberle.com tərəfindən ünvanlanan sorğulara bəzən qısa və ümumi cavablar verilib. Bu dəfə idarəyə aşağıdakı mövzuda sorğu ilə müraciət etdik. 
1. Sumqayıtda orta ümumtəhsil məktəblərindən hazırda yaşı 65-i ötmüş neçə əməkdaş çalışır? Onlardan neçəsi pedaqoji, neçəsi texniki heyət üzvüdür? 65 yaşdan sonra müqavilə müddətinin uzadılması hansı prinsiplər əsasında aparılır?
2. Abşeron-Xızı Regional Təhsil İdarəsi neçə nəfər şəhid ailəsi, qazi və digər bu kateqoriyadan olan şəxsləri işə qəbul edib? 
Abşeron-Xızı Regional Təhsil İdarəsi öncə sorğumuza gec münasibət bildirsə də, növbəti dəfə əlaqə saxladıqdan sonra ətraflı cavab verəcəklərini bildiriblər. İdarənin ilkin cavabı belə oldu:
"Verdiyiniz sorğuda tələb etdiyiniz məlumatlar araşdırma tələb etdiyindən statistik məlumatlar müvafiq dəqiqləşdirmələr aparıldıqdan sonra sizə təqdim olunacaq".
Olsun, bizə gözləmək qalır.

Məsələ ilə əlaqədar hüquqşünas Ramil Süleymanov Xeberle.com-a açıqlama verərək bildirib ki, Azərbaycan Respublikası Konstitusiyasının 50-ci maddəsinə görə hər kəs məlumatı qanuni yolla axtarmaq, əldə etmək, ötürmək, hazırlamaq və yaymaq azadlığına malikdir. Bu vəzifə cəmiyyət içində daha çox jurnalistlərə aiddir. Jurnalistin belə bir sorğunu verməsi də tam normaldır. Eyni zamanda informasiya əldə etmək haqda Azərbaycan Respublikasının Qanununda  açıq şəkildə göstərilir ki, əgər sorğu edilən informasiya sirr təşkil etmirsə və bu ictimaiyyətə açıqlanmalı olan bir məlumatdırsa və ya qanunla qorunması nəzərdə tutulmayıbsa, bu barədə sorğu təqdim edən tərəfə cavab verilməlidir. Azərbaycan Respublikasının Dövlət Sirri haqqında Qanununun 1.0.1- ci maddəsinə görə, Dövlət Sirri dövlətin hərbi, iqtisadi, kəşfiyyat əməliyyat axtarış fəaliyyəti ilə bağlı olan və dövlət tərəfindən mühafizə edilən və yayılması Azırbaycan Respublikasının təhlükəsizliyinə ziyan vuran məlumatlardır. Eyni zamanda, qanunda qeyd olunur ki, dövlət sirrinə aid olunmayan məlumatlar sırasında təhsillə bağlı olan məlumatlar da yer almaqdadır və məmur bu məlumatları verməyə borcludur.
"Təhsillə bağlı sualları Elm və Təhsil Nazirliyinə deyil, Kənd Təsərrüfatı Nazirliyinə, Baytarlıq xidmətinə ünvanlasanız, daha optimal cavab alarsınız, nəinki adıçəkilən quruma”. Bunu təhsil eksperti Kamran Əsədov mövcud problemə açıqlama verərkən deyib.
Ekspert vurğulayıb ki, dövlət sirri qanunla müəyyənləşmiş fəaliyyəti özündə əks etdirən informasiyalar mənbəyidir. Mütləq şəkildə Elm və Təhsil Nazirliyi məlumatları verməlidir. Və bu məlumatlar ona görə verilməlidir ki, cəmiyyət media vasitəsi ilə dolğun informasiya alsın. Bu qurum isə yalnız özlərinə yaxın olan saytlara və jurnalistlərə müəyyən informasiyaları ötürür. İşə qəbul edilən imtiyazlı şəxslərin kimliyini bildirmədən statistik rəqəmləri vermək, əlbəttə ki, dövlət sirri deyil. Lakin gəlin müqayisə edək - idarənin işə qəbul etdiyi həssas qrupdan olanların sayı çoxdur, yoxsa dostluq, qohumluq münasibətləri zəminində işə qəbul edilənlərin? Bu gün Elm və Təhsil Nazirliyi və onun yerli regional idarələrindən hər hansı bir məlumatı almaq müşkül məsələdir.
Xədicə Səxavətqızı
P.S.  Qeyd edək ki, öncə idarə tərəfindən bu məlumatların təqdim edilməsi uyğun bilinməsə də, az sonra sorğuya cavab verilib.