Türkiyə tərəfindən vurulan Rusiyaya məxsus SU-24 təyyarəsinin sağ qalan pilotu, kapitan Konstantin Muraxtin hadisə ilə bağlı Rusiya mətbuatına açıqlama verib.

İnterAz xəbər verir ki, pilot müsahibəsi zamanı bildirib ki, onun təyyarəsi heç bir halda Türkiyə sərhəddini keçməyib və vurulan zərbə tamamilə gözlənilməz olub.

"Biz 6 min metr hündürlükdə uçurduq. Hava da təmiz və aydın idi. Mən həm xəritədə, həm də ərazidən bilirdim ki, hardayıq. Heç Türkiyə hava sərhədlərini keçmək təhlükəsi belə yox idi. Qəti olaraq"-deyə pilot jurnalistlərə bildirib. 

"Biz dəfələrlə həmin ərazidə hərbi əməliyyatlar keçirmişik. Ərazini beş barmağım kimi tanıyıram. Mən hətta xəritə olmasa belə ərazidə istiqamətləri yaxşı tanıyıram"-pilot əlavə edib. 

Bundan əlavə pilot Türkiyə tərəfindən heç bir xəbərdarlığın olmadığını vurğulayıb." Hücum birdən oldu. Biz hücumdan yayınmaq üçün imkan tapa bilmədik"-pilot qeyd edib. 

Qeyd edək ki, baş verən bu hadisə Rusiya Türkiyə arasında siyasi gərginlik yaradıb.