Sabiq xarici iqtisadi əlaqələr naziri Nicat Quliyevin apellyasiya şikayətinə nə vaxt baxılacağı bilinib.

“Media forum” saytı xəbər verir ki, keçmiş nazirin şikayəti üzrə məhkəmə prosesi mayın 15-i Sumqayıt Apellyasiya Məhkəməsində başlayacaq. İşə hakim Nazim Mövsümovun sədrliyi ilə baxılacaq.

Nicat Quliyevi 2013-cü il avqustun 7-də MTN həbs edib. Abşeron Rayon Məhkəməsinin hökmü ilə sabiq nazir 3 il müddətinə azadlıqdan məhrum edilib. O, qanunsuz olaraq odlu silah saxlamada təqsirli bilinib. Vəkillər Abşeron Rayon Məhkəməsinin hökmündən apelyasiya şikayəti veriblər.

Şikayətdə Nicat Quliyev barəsində hökmün ləğv edilməsi, ona bəraət verilməsi və azadlığa buraxılması istənilir. Bundan başqa şikayətdə sabiq nazirin Azərbaycan Konstitusiyası və Avropa İnsan Hüquqları Konvensiyası ilə təsbit olunan və qorunan insan azadlığı, təqsirsizlik prezumpasiyası, qeyri-insani rəftara məruz qalmamaq, müdafiə, şəxsi, ailə həyatına hörmət, ədalətli, qərəzsiz və müstəqil məhkəmə araşdırması hüquqlarının pozulması hallarına yol verən şəxslər barəsində xüsusi qərar qəbul edilməsi tələbi qoyulub.