"Qəbələ” idman klubu Avropa Liqasının III təsnifat mərhələsində Kiprin "Apollon” komandası ilə matçda baş vermiş qalmaqalla bağlı bəyanat yayıb.
Klubdan verilən məlumata görə, bəyanatda qeyd edilir ki, UEFA Avropa Liqası 3-cü təsnifat mərhələsinin ilk oyunu çərçivəsində Kiprin Larnaka şəhər stadionunda keçirilmiş "Apollon” – "Qəbələ” (1:1) oyununda baş verən hadisələr dərin təəssüf hissi doğurub.
"Futbol ictimaiyyətinin diqqətinə çatdırmaq istərdik ki, matçdan öncə həm rəqib klubun rəhbərliyinə, həm də UEFA nümayəndəsinə xoşagəlməz halların baş verməməsi üçün tədbir görülməsinin vacibliyi bildirilib. Eyni zamanda, daha öncə klub və milli komandalar səviyyəsində Kiprdə keçirilmiş oyunlarda yaşanmış qalmaqallar hər iki tərəfin nəzərinə çatdırılıb".
Xatırladaq ki, komandamızın kapitanı Cavid Hüseynov 2006-ci ildə 19 yaşlılardan ibarət Azərbaycan – Ermənistan milli komandalarının oyununda da kiprli azarkeşlərin fiziki təzyiqinə məruz qalıb.
Klub rəhbərliyi təəssüf hissi ilə qeyd edib ki, keçmişdə baş vermiş bənzər hadisələr bu oyunda da yaşanıb. "Rəqib komandanın azarkeşləri ölkəmizin bayrağının yandırılmasına cəhd etsələr də, dərhal UEFA nümayəndəsi və "Apollon” klubunun rəhbərliyinə etirazımız bildirilib və məsələyə müdaxilə etmələri tələb edilib. Bu tələbimizdən sonra qarşı tərəf bayrağımızın yandırılmasının qarşısını alıb.
Bununla belə, bütün xəbərdarlıqlarımıza baxmayaraq, tribunalarda xoşagəlməz hadisələr davam edib. "Apollon” azarkeşləri ölkəmizin atributlarını təhqir etməkdən çəkinməyib.
Daim rəqibə, hakimlərə, azarkeşlərə hörmət prinsipini əsas tutan "Qəbələ” İK idman meydanlarında bu cür hadisələrin baş verməsinə qarşıdır. Bu səbəbdən 06 avqust 2015 tarixində keçiriləcək cavab oyununda azarkeşlərimizi təxribatlara uymamağa və yalnız komandamızı dəstəkləməyə çağırırıq".
"Qəbələ" "Apallon" oyunundan görüntü
Matçda qalmaqal
Xatırladaq ki, iyul ayının 9-da "Qəbələ" ilə "Dinamo” arasında baş tutan matçda da bənzər hadisə baş vermişdi. Tiflisdə keçeirilən oyun zamanı bir qrup təxribatçı tərəfindən Azərbaycan bayrağı təhqir edilmişdi.
"Qəbələ" o zaman da bəyanat yayaraq bu cür hadisələrə yol verənlərin hər iki ölkədə aşkar ediləcəyi və layiqli cəzalarını alacaqları barədə bəyanat yaymışdı. (anspress.com)
Xəbərdən istifadə edərkən istinad etmək vacibdir.
