Fevralın 14-15-də Azərbaycan Milli Antidopinq Agentliyi (AMADA) "Pricewaterhouse Coopers Audit Azerbaijan" şirkəti "MİDA" MMC ilə birgə əməkdaşlıqda Bakı-2017 Oyunlarında dopinq nəzarətini təmin etmək üçün Dopinq Nəzarəti əməkdaşlarına təlimə start verib.
Xeberle.com Trend-ə istinadən bildirir ki, iki günlük təlimdə Dopinq Nəzarəti əməkdaşlarının dopinq nəzarətini təşkil etməyin incəliklərinə yiyələnəcək və möhtəşəm Bakı-2017 Oyunlarında bunu təmin edəcəklər. Onların əsas vəzifəsi atletlərdən analizlərin götürülməsi, müəyyən olunmuş qaydalara əsasən hüquqları qorumaqla, analizin götürülmə prosesini müşahidə etmək və həmin prosesi protokollaşdırmaqdır.
PWC şirkətinin Beynəlxalq Dopinq Xidməti üzrə mütəxəssisi Aleksandr Kirxbixler deyib: "Almaniyadan gələn təlimçilərimizin məqsədi yerli dopinqə nəzarəti təmin edəcək heyətə təlim keçməkdir. Yeri gəlmişkən, bizim təlimçilərimiz Bakı-2015 Avropa Oyunlarında da xidmət göstərmişdi. İki günlük təlimdə Dopinq Nəzarəti məntəqələri dopinq haqqında lazımi biliklərə yiyələnəcək və praktik çalışmalar yerinə yetirəcək. Bu təlimdən sonra inanırıq ki, təlim alan əməkdaşlar gələcəkdə Azərbaycanda keçiriləcək bütün idman yarışlarında nəzarəti yüksək səviyyədə təmin edəcəklər. Sonda onu da qeyd etmək istəyirəm ki, İslam Oyunları da yüksək səviyyədə və uğurla başa çatdırılacaq".
Qeyd edək ki, AMADA təşkilatı 23 dekabr 2016-ci il tarixində Azərbaycanda yaradılıb. AMADA-nın əsas fəaliyyəti atletlərin dopinqsiz idmanda iştirakının fundamental hüquqlarını təmin etmək, milli antidopinq proqramını tərtib və təşviq etmək, Dünya Antidopinq məcəlləsi və beynəlxalq standartlara əsasən atletlərin testini təşkil etməkdir.
PWC 1994-cü ildə yaradılıb və dopinq analizlərinin götürülməsi xidməti ilə məşğuldur. 2003-cü ildən bəri Almaniya Milli Antidopinq Agentliyi ilə əməkdaşlıq edir. Bundan başqa, şirkət WADA, bir çox Milli Antidopinq Təşkilatlarına və Beynəlxalq İdman Federasiyalarına dopinq analizlərinin götürülməsi xidmətini göstərir. PWC şirkəti Beynəlxalq Xizək Federasiyasına rəhbərlik edir və dopinq proqramını işləyib hazırlamaqla məşğuldur.
Xəbərdən istifadə edərkən istinad etmək vacibdir.
