Professional nailiyyətləri və şəxsi həyatları ilə həmişə ictimaiyyətin diqqətində olan idmançılar zaman-zaman ciddi qanun pozuntularına da yol verir. Bu qanun pozuntuları idmançıların karyerasını ləngitməklə yanaşı, onların azadlıqdan məhrum olunması ilə də nəticələnə bilər. Müxtəlif illərdə qanunu pozduqları üçün mühakimə olunan dünya idmançılarının siyahısını təqdim edir.    

Mayk Tayson

Dünya boksunun ən məşhur və qalmaqallı simalarında olan Mayk Tayson qanun pozuntusuna görə 3 dəfə məhkumluq həyatı yaşayıb. 20 yaşında superağır çəkidə dünya çempionu adını qazanan Tayson 1991-ci ilin iyulunda "Miss Qara Afrika” seçilən 18 yaşlı Dezire Vaşinqonu mehmanxana nömrəsində zorlamaqda ittiham olunub. 1992-ci ilin fevralında məhkəmə Taysonu bu əməli törətməkdə təqsirli bilir və 6 il müddətinə azadlıqdan məhrum edib. 3 illik həbsdən sonra azadlığa buraxılan qaradərili boksçu yenidən çempionluq titulunu özünə qaytarsa da, ildən-ilə onun çıxışları zəif təsir bağışlamağa başlayır. 1997-ci ildə Evander Holifildlə görüşdə rəqibinin qulağını dişləyən Tayson 1 il müddətinə boks lisenziyasından məhrum edilir və 3 milyon dollar təzminat ödəməyə məcbur olur. O 1998-ci ildə adam döydüyünə görə 3,5 ay müddətinə həbsdə yatır. 2006-cı ildə isə narkotik vasitələrdən istifadə edərək maşın idarə etdiyi üçün 1 aylıq cəza alır.

Qanunla bağlı problemləri Mayk Taysona tam əsasda boksçu karyerasını inkişaf etdirməyə imkan vermir.    

Eduard Streltsov

Lev Yaşinlə birlikdə Sovet İttifaqının ən perspektivli futbolçusu sayılan Streltsov törətdiyi cinayətə görə futbolçu karyerasını inkişaf etdirə bilməyib. O 16 yaşında "Torpedo” klubunun heyətində çıxış etməyə başlayıb. 17 yaşında SSRİ yığma komandasının heyətində çıxış edib və 1 il sonra "Torpedo” klubunun heyətində ölkə çempionatının bombardiri olub. Eduard Streltsovun başçılığı altında SSRİ yığması 1956-cı il Olimpiya Oyunlarında qızıl medal qazanır.

Bütün ekspertlər perspektivli futbolçunun ulduzunun 1958-ci il dünya çempionatında parlayacağını gözləyirdi. Lakin çempionatın başlamasına bir neçə gün qalanda Streltsov komanda yoldaşları Boris Tatuşin və Mixail Oqonkovla birlikdə sovet milisi tərəfindən həbs olunur. Futbolçulara "zorlama” maddəsi ilə cinayət işi çalışır. Məhkəmə Tatuşin və Oqonkova bəraət versə də, Eduard Streltsovu günahkar bilir və 12 il müddətinə azadlıqdan məhrum edir. 1963-cü il fevralın 4-də, 5 il həbs yatdıqdan sonra onu vaxtında əvvəl azad edirlər. 1965-ci ildə isə SSRİ futbol rəhbərliyi ona yenidən futbolla məşğul olmağa icazə verir. Lakin karyerasının əsas illərini həbsxanada keçirən Edurad Streltsov yaşıl meydanlarda əvvəlki uğurunu təkrarlaya bilmir.

Oskar Pistorius

Paralimpiya Oyunlarının 6 qat qalibi, 2011-ci il dünya çempionatının gümüş mükafatçısı Oksar Pisterius Cənubi Afrika Respublikasının ən populyar oyunçlarından idi. 11 aylıq körpə ikən hər iki ayağı dizdən aşağı amputasiya edilir, lakin protezlə təmin olunduqdan sonra idmanla daha aktiv məşğul olur. Pesteriusu uğurlu idman karyerası gözləsə də, 2013-cü il fevralın 14-də baş verən hadisə onun reputasiyasına sağalmaz zərbə vurur. "Sevgililər günü”ndə 27 yaşlı sevgilisinə sürpriz etmək istəyən və buna görə yaşadıqları evə gizlicə daxil olan 30 yaşlı Reva Stenkamp Oskar Pistorius tərəfindən güllələnir. Sonradan istintaqa verdiyi açıqlamada Pistorius evə oğrunun daxil olduğnu zənn etdiyi üçün kortəbii atəş açdığını deyir. Cənubi Afrika məhkəməsi paralimpiyaçını "ehtiyatsızlqıdan adam öldürmə” maddəsi ilə günahkar bilərək 5 il müddətinə azadlıqdan məhrum edir.

Bruno Fernandeş de Souza

Braziliyanın "Flamenqo” klubunun kapitanı, 2009-cu il Brazilya çempionatının qalibi Bruno Fernandeş isə amansız qətlə görə mühakimə olunub. 2009-cu ildə "Flamenqo”nun heyətində çempionluq sevinci yaşayan qapıçı elə həmin il 25 yaşlı sevgilisi Eliza Samodiunu oğurlayır. Hamilə olan sevgilisinin ondan aliment tələb etməsindən qəzəblənən Bruno Fernandeş abort etdirməsi üçün Eliza Samodiya işgəncələr verir. 2010-cu ilin iyun ayında isə "Flamenqo”lu futbolçu sevgilisini hiylə yolu ilə mehmanxana nömrəsinə gətirir və boğaraq öldürür. Daha sonra hissələrə böldüyü cəsədi itlərə yem edir.

Sevgilisinin amansız qətlinə görə "Flamenqo” klubunun kapitanı Bruno Fernandeş de Souza 2013-cü ilin martında 22 il müddətinə azadlıqdan məhrum edilir.

Bununla da futbolçunun idman karyerasının vaxtından öncə başa çatdığını demək olar.

O.Cey Simpson

Amerika futbolu ABŞ-ın ən populyar və milli idman növü hesab olunur. Təsadüfi deyil ki, bu idman növündə uğur qazanan şəxslər bütün ölkə miqyasında sevilirdi. Qaradərili O.Cey Simpson da məhz belə populyar futbolçulardan biri idi. Milli Ftibol Liqasındakı 10 illik karyerası boyu (1969-1979) O.Cey Simpson bir çox rekordlara imza atmışdı. Professional karyerasını başa vurduqdan sonra isə televiziya şərhçisi kimi çalışır və bəzi Hollivud filmlərində köməkçi rollar ifa edirdi.

1994-cü ilin iyununda Simpson həyat yoldaşı Nikki Braun və onun dostu Ronald Qoldmanı qətlə yetirməkdə təqsirləndirilir. Əleyhinə ciddi sübutlar olsa da, professional vəkillərinin köməy ilə O.Cey Simpson cinayət işindən bəraət qazanır.

Məşhur futbolçu buna baxmayaraq, femidanın əlindən yaxasını qurtara bilmir. 2008-ci ildə bir neçə dostu ilə birlikdə 2 silah kolleksiyaçısının mağazasına hücum edən O.Cey Simpson məhkəmənin qərarı ilə 33 il müddətinə azadlıqdan məhrum edilir. 2 insanın qətlindən cəzasız qurtulan 65 yaşlı keçmiş futbolçu üçün bu hökm əslində ömürlük həbs cəzası idi. 

Tim Montqomeri, Stiv Riddik, Marion Cons

2008-ci ildə ABŞ-da yüngül atletika yarışlarının iştirakçısı olan 3 idmançı barəsində məhkəmə prosesi keçirilir. Atletlər Tim Montqomeri, Stiv Riddik və Marion Cons saxta pul çeklərinin hazırlanmasında və idman yarışlarında göstəricilərini yaxşılaşdırmaq üçün qadağan olunmuş dərmanalar qəbul etməkdə ittiham olunurdular. Proses idmançıların təqsirini tam sübuta yetirir. 2000-ci ildə Sidney Olimpiya Oyunlarında 3 qızıl və 2 bürünc medal qazanan Marion Cons bütün titulları əlindən alınmaqla 6 müddətinə azadlıqdan məhrum edilir. Onun cinayət ortağı və 2002-ci ildə 100 metr məsafəyə qaçışda dünya rekordu qıran Tim Montqomerinin də bütün idman nailiyyətləri ləğv olunur və 5 il müddətinə azadlıqdan məhrum edilir. Stiv Riddik isə çek saxtakarlığına və narkotik vasitə satışına görə 5 il 3 ay müddətinə həbslə "mükafatlandırlır”.   (modern.az)