Azərbaycanın işğal altında olan Dağlıq Qarabağ bölgəsinin mərkəzi Xankəndi şəhərində bu gün Krımın Rusiya tərəfindən ilhaqı bayram edilib. 

ANS PRESS-in məlumatına görə, qondarma rejimin rəhbərliyinin də iştirak etdiyi mitinqdə əsasən ali məktəb tələbələri, müəllimlər və dövlət məmurları olublar ki, onları da mitinqə iş yerindən məcburi gətiriblər. Yəni təpədən-dırnağa kimi problem içində olan sadə Qarabağ erməniləri mitinqə heç bir maraq göstərməyiblər. 

Amma buna baxmayaraq Xənkəndidə Ermənistan rəhbərliyinin formalaşdırdığı qondarma rejimin televiziyası hadisədən yararlanaraq Krım kimi muxtar qurumların müstəqilliyinin tanınması ilə Dağlıq Qarabağ üçün də yol açılacağını bildirməyə başlayıb. Kanalın politoloq kimi təqdim etdiyi hansısa David Babayan 2008-ci ildən bu məsələdə vəziyyətin dəyişdiyini və Krım hadisəsi muxtar qurumların müstəqil dövlət kimi tanınması üzrə daha bir presedent olduğunu vurğulayıb. 

Babayan 2014-cü ildə Şotlandiya və Kataloniyada da bu istiqamətdə addımlar atılacağını deyib. Yəni erməni politoloq bununla da Helsinki xartiyasının qüvvədən düşəcəyinə işarə vurub. 1975-ci il avqustun 1-də 35 dövlət tərəfindən imzalanmış, sonradan dünyanın əksər dövlətlərinin tanıdığı xartiya dövlətlərin ərazi bütövlüyünü nəzərdə tutur. Xartiyaya görə, öz aralarında federal saziş bağlamayan muxtar qurumlar mərkəzi hökumətin icazəsi olmadan müstəqillik qazana bilməzlər. Yəni ermənilər bu qaydanın qüvvədən düşəcəyinə ümid edirlər. 

Lakin politoloq Qabil Hüseynli ANS PRESS-in əməkdaşı ilə söhbətində ermənilərin boş yerə ümidləndiyini bildirir. Onun sözlərinə görə, ermənilər Şotlandiya və Kataloniyada gözlənən referendumlara boş yerə ümid bağlayırlar. Çünki hər iki muxtar qurumda referendum daxil olduqları ölkələrin mərkəzi hakimiyyətləri tərəfindən təyin edilib. Yəni Dağlıq Qarabağda referendum təyin edilməsi məhz Azərbaycan hökumətinin səlahiyyətindədir. 

Qabil Hüseynlinin fikrincə, əslində 2014-cü ildə Rusiya seperatizmə qarşı mübarizəni gücləndirməli olacaq. “Dünyada 5 mindən çox xalq var və yalnız 120-yə yaxın xalq milli dövlətə malikdir. Qalanları bu və ya başqa şəkildə müstəqillik uğrunda mübarizə aparırlar. Bu xalqların hamısının müstəqilliyi tanınarsa, dünya xaosa girər. Özü də müstəqillik uğrunda mübarizə aparan xalqların xeyli hissəsi Rusiyada yaşayır. Krımda elədiyi səhvə görə beynəlxalq qüvvələr sanksiyalarla Rusiyanı elə vəziyyətə salacaq ki, axırda Moskva özü maraqlı tərəfləri Krım məsələsi üzrə beynəlxalq danışıqlara çağırmağa məcbur olacaq”,- deyə politoloq vurğulayıb.