Zeyn Kərimzadə adlı Sumqayıt sakini Xeberle.com portalının elektron ünvanına şikayət məktubu yollayıb. Məktubu olduğu kimi nəzərinizə çatdırırıq:

"Salaməleyküm, Xeberle.com portalı. Çox xahiş edirəm Kottec qəsəbəsindəki Acı dərə kanalı barədə yazasınız. Bəlkə icra başçımız bu problemlə məşğul ola. Nə də olsa, qələminiz güclüdür. Çox xahiş edirəm, mən də nə kömək lazımdırsa, bir sakin kimi, edərəm. Bir dəfə o kanal daşıb evimizi su basıb. Bir dəfə də qonşumuza qonaq gələn uşaq düşüb boğulmuşdu o kanalda. Təəssüf ki, ölkənin 3-cü böyük şəhəri olan Sumqayıtın kanalizasiya sistemi biabırçı vəziyyətdədir”.

Redaksiyadan:

Hörmətli Zeyn Kərimzadəyə cavab olaraq bildiririk ki, bu problemi dəfələrlə portalımızda və ictimaiyyət arasında qabartmışıq. Yeri gəlmişkən, Sumqayıt şəhər İcra Hakimiyyətinin başçısı Eldar Əzizov şəhərin hesabat konfransında məhz bu problemə toxunaraq aşağıdakıları söylədi:

"Sumqayıtın ən aktual, açıq qalan problemlərindən biri də Acı dərə kanalıdır. XXI əsrdə belə bir kanalın Sumqayıtın mərkəzindən axıb keçməsi böyük qəbahətdir. Qafqaz regionunun 2-ci böyük sənaye şəhərində belə antisanitariya və natəmizlik yolverilməzdir".

O bildirdi ki, imkan daxilində tez bir zamanda bu problemu "Azərsu" ASC ilə birlikdə yoluna qoymağa çalışacaqlar. İcra başçısı Sumqayıt Sukanal idarəsinin rəisinə bu problemə daim nəzarət etməyə və diqqətdə saxlamağı tapşırıb.

Xeberle.com