İrlandiya yığması ötən Avropa çempionatına qədərki olan zaman kəsiyində adətən final mərhələsinə yüksəlmək şansını son anda əldən verirdi. Məsələn, 1992, 1996, 2000-ci illərdə Avropa çempionatının final mərhələsinə çıxmağa yaxın olan irlandiyalılar son iki halda pley-offda "ilişmişdilər”. Əvvəl Hollandiya qarşısında aciz qalan komanda 16 il öncə isə Türkiyə tərəfindən dayandırılmışdı. Bir qayda olaraq DÇ və AÇ-nin pley-off mərhələsində mübarizəni dayandırmaqla belə demək mümkünsə, azakeşlərinin ürəyini ağzına gətirməsiylə fərqlənən komanda son iki AÇ-yə gedən yolda isə özləri üçün arzuolunmaz tendensiyanı qıra bildi. Əslində, AVRO-2012-nin final mərhələsinə qədər "adalılar” DÇ-2010-un iştirakçısı olmağa yaxın idi. Amma Fransa ilə pley-off matçında Anrinin komanda yoldaşına əli ilə etdiyi məhsuldar ötrmədən sonra üstünlüyünü əldən verən Covanni Trapattoni "drujinası” sonda DÇ-ni kənardan izləməli olmuşdu. Taleyin gərdişindən fransızlar həmin mundialda qrup sonuncusu oldu. Belə demək mümkünsə, Futbol Tanrısı "xoruzlar”ı sərt cəzalandırmışdı. Belə varlığın mövcudluğuna İrlandiya millisinin nəhayət, İrlandiya millisinin pley-off mərhələsində bəxtinin gətirdiyi məqamda inam artmaya bilməzdi. Axı püşk "yaşıllar”ın üzünə gülmüş və komanda qitənin zəiflərindən sayıılan Estoniya ilə oynamalı olmuşdu. Gözlənildiyi kimi, estonları üstələyən irlandlar qitə birinciliyində oynamaq hüququ qazanmışdı. Yeri gəlmişkən, komandanın qitə çempionatındakı debütü o vaxt çoxlarını təəccübləndirmişdi. Düzdür, ingilis Cekki Çarltonun çalışdırdığı yığma cəmi 8 komandanın qatıldığı qitə çempionatında, gözlənildiyi kimi, qrup səddini aşa bilmədi, amma İngiltərə üzərindəki qələbə və ümumilikdə dörd xalın yığılması əksər mütəxəssislər üçün gözlənilməz olmuşdu. AFR-dakı çempionatda irlandların yarımfinal yolunu isə gələcək çempion Hollandiya kəsmişdi.

AVRO-2016-nın seçmə mərhələsini üçüncü sırada tamalayan Martin O Nilin komandası Bosniya və Herseqovinanı məğlub etməklə tarixində üçüncü dəfə Avropa çempionatında oynamaq hüququ qazandı. "Yaşıl oğlanlar”ın qrup mərhələsində ən diqqətçəkən göstəricisi isə son dünya çempionu Almaniyadan dörd xal (1:0, 1:1) alınması idi.

AÇ-yə kimlər gedir?

Turnir öncəsi İralandiya milli koamdasının məşqçilər korpusunu bir neçə məsələ daha çox düşündürür ki, bu da "adalılar”ın heyətində problemlərin olması ilə bağlıdır. Belə ki, Rob Elliot və Alan Djadjın çempionatı buraxacağının əvvəldən məlum olması, baş məşqçi Martin Onilin ilkin heyətə daxil etdiyi "Stok Siti”li Mark Uilsonun zədələnərək uzun müddətə sıradan çıxması, zədədən əziyyət çəkən Şey Given, Deril Mörfi, və Ceff Hendrikin isə AÇ-yə qədər nə dərəcədə hazır olacağının bilinməməsi narahatlığa əsas verir. Yerli azarkeşləri isə daha çox komandanın lideri Robbi Kinin Fransaya aparılıb-aparılmayacağı düşündürürdü ki, sonda "Los Anceles Qalaksi”də forma geyən 36 yaşlı hücumçu "23-lük”də yer aldı. Xatırladaq ki, yığmanın tarixində hələ ki, bir nömrəli bombardir olan Robbi Kin son illərdə oyun praktikasından əziyyət çəkdiyindən Avropanı Amerikaya dəyişməli olmuşdu. Yığmanın heyətində həm də ən çox oyun keçirən futbolçu olan kapitan əvvəllər qol sevincini qeyri-adi tərzdə qeyd etməsi ilə diqqət mərkəzinə düşürdü: rəqib qapısına yol tapandan sonra künc bayraqlarından birinə yaxınlaşaraq dombalaq aşır və əlləri ilə sanki avtomatdan atəş açırdı. Ancaq hakimlərin çoxsaylı xəbərdarlığından sonra bu hərəkətindən əl çəkməli olmuşdu.

Robbi Kin və İngiltərədəkilər

İrlandiya yığma komandası AÇ iştirakçılarından hazırkı yığma oyunçularının öz ölkəsindən kənarda top qovması ilə seçilir. Komandanın əfsanəsi sayılan Robbi Kindən başqa AÇ-yə yollanan bütün oyunçular İngiltərə Premyer Liqasında top qovur. Düzdür, bu futbolçular heç də İngiltərədə ab-havanı müəyyənləşdirən klubların formasını geymir, ancaq yenə də "Dumanlı Albion”da top qovmaq üstünlükdür.

Qapıçılar: Şey Given ("Stok Siti”, İngiltərə), Darren Randolf ("Vest Hem”, İngiltərə), Kiran Vestvud ("Şeffild Uenzdi”, İngiltərə)

Müdafiəçilər: Kirus Kristi, Riçard Keoq (hər ikisi "Derbi Kaunti”, İngiltərə), Klaran Klark ("Aston Villa”, İngiltərə), Simus Koulmen ("Everton”, İngiltərə), Şeyn Daffi ("Bləkbörn”, İngiltərə), Con O'Şi ("Sanderlend”, İngiltərə), Stefen Uord ("Bernli”, İngiltərə)

Yarımmüdafiəçilər: Ues Holahan, Robbi Bredi (hər ikisi "Norviç”, İngiltərə), Ceff Hendrik ("Derbi Kaunti”, İngiltərə), Ceyms MakKarti ("Everton”, İngiltərə), Ceyms Maklin ("Vest Bromviç”, İngiltərə), Alden MakQedi ("Şeffild Uenzdi”, İngiltərə), Devid Meyler ("Hall Siti”, İngiltərə), Stefen Kuinn ("Ridinq”, İngiltərə), Qlenn Uelan ("Stok Siti”, İngiltərə)

Hücumçular: Robbi Kin ("Los Anceles Qalaksi”, ABŞ), Şeyn Lonq ("Sauthempton”, İngiltərə), Deril Mörfi ("İpsviç”, İngiltərə), Conatan Uolters ("Stok Siti”, İngiltərə).

İrlandiya əvvəlki Avropa çempionatlarında:

1960 – Final mərhələsinə yüksələ bilməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Qrup mərhələsi

1992 – Final mərhələsinə yüksələ bilməyib

1996 – Final mərhələsinə yüksələ bilməyib

2000 – Final mərhələsinə yüksələ bilməyib

2004 – Final mərhələsinə yüksələ bilməyib

2008 – Final mərhələsinə yüksələ bilməyib

2012 – Qrup mərhələsi

AÇ iştirakçısı bizə qarşı: Hələ "siftə” etməmişik

Irlandiya milli komandası Azərbaycan yığması ilə heç vaxt qarşı-qarşıya gəlməyən azsaylı seçmə komandalardan biridir. Püşkün bizə rəqib seçmədiyi "yaşıl oğlanlar” AFFA-nın hazırlıq matçlarında da yığmamız üçün seçdiyi rəqiblər arasında yoxdur.

"Bir nömrə altında” oynamamaq irlandlara nə verəcək?

İrlandiya yığmasının AVRO-2016-da olduqca çətin qrupda yer alması onların şanslarının yüksək dəyərləndirməyə imkan vermir. Ancaq İtaliya millisi favoritlər sırasında, Belçika və İsveç isə perspektivli yığma sayıldığından irlandlar hər üçü qarşısında "bir nömrə altında” oynamayacaq ki, bu da onların daha rahat oynaması və sürpriz etməsini şərtləndirə bilər. Ancaq o da var ki, İrlandiya yığması reytinqinə görə qarşıdakı AÇ-yə qatılan yığmalar arasında ən aşağı yerlərdən birini tutur. Bu səbəbdən İrlandiya 1/8 finala adlasa, bu artıq boyundan yuxarı tullanmaq olacaq.

AVRO-2016-da oyunları:

13 iyun. 20:00. İrlandiya – İsveç

18 iyun. 17:00. Belçika - İrlandiya

22 iyun. 23:00. İtaliya - İrlandiya

Tural Məmmədov