Azərbaycan Mədəni İrs Sənətkarlığına Dəstək və Kreativ Sənaye İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi "Sənətkarlıqdan sosial sahibkarlığa” adlı layihənin iş planına uyğun tədbir Mədəniyyət Nazirliyinin Lənkəran – Astara regional mədəniyyət idarəsinin təşkilati dəstəyi ilə Lənkəran şəhərində keçirilmişdir. Sözügedən layihənin əsas məqsədi sənətkarlıq ilə məşğul olan və bu sahəyə marağı olan şəxslərin peşəkar bacarıqlarının artırılmasına, onlar arasında sosial sahibkarlığın təşviqinə, sənətkarlıq üzrə regionlarda sahibkarların sayının artırılması və onların fəaliyyətinə dəstək olmaqdır.
Layihənin ilk tədbiri 1 sentyabr 2023-cü il tarixində Lənkəran – Astara regional mədəniyyət idarəsinin təlim və sərgi mərkəzində təşkil edilmişdir. Tədbirdə əsasən cənub regionu üzrə layihənin benefisiarları iştirak etmiş və onlara sənətkarlıq sahəsində sosial sahibkarlıq fəaliyyətinin qurulması mövzusunda dəyirmi masa keçirilmiş və sənətkarların əl işlərindən ibarət sərgi təşkil olunmuşdur. Tədbirdə Lənkəran, Masallı, Lerik və Astaradan olan sənətkarlar, mədəni irs sahəsi üzrə ixtisaslaşmış sahibkarlar və mütəxəssislər iştirak etmişdir.
Tədbirin açılışında çıxış edən Azərbaycan Mədəni İrs Sənətkarlığına Dəstək və Kreativ Sənaye İctimai Birliyinin sədri Aytən Həsənova "Sənətkarlıqdan sosial sahibkarlığa” adlı layihənin məqsəd və vəzifələrindən ətraflı bəhs etmişdir. İctimai Birliyin sədri sözügedən layihənin sənətkarların peşəkar bacarıqlarının artırılmasına, sosial sahibkarlıq fəaliyyətinin təşkilinə, həmçinin milli məhsul brendlərimizin sayının artırılması və ixracına dəstək olmaqla yanaşı, cənub regionunun sənətkarlıq nümunələrinin tanıdılmasına, qədim sənət ənənələrinin dirçəldilməsinə və şəhərin mədəni həyatının inkişafına dəstək verəcəyini xüsusilə qeyd etmişdir.
Həmçinin, tədbirin açılışında çıxış edən Lənkəran-Astara regional mədəniyyət idarəsinin rəhbəri Bəxtiyar Qılıncov qonaqları salamlayaraq onları Lənkəranda görməkdən məmnun olduğunu bildirmiş, icra olunan layihənin cənub regionu üçün vacibliyini qeyd etmiş və ölkənin bütün bölgələrində təşkil olunmasının əhəmiyyətini xüsusi vurğulamışdır. Tədbirdə iştirak edən "Leyla Xazari” Rəsm Qalereyasının təsisçisi və rəhbəri Leyla Xəzəri sənətkarların istehsal etdikləri məhsulların brendləşdirilməsinin əhəmiyyətindən və bunun yollarından danışaraq öz tövsiyələrini vermişdir. Layihənin mentoru Arif Nəcimov öz çıxışında sənətkarların sahibkarlıq fəaliyyəti və sosial sahibkarlığa keçidi haqqında ətraflı məlumat paylaşmış, gələcəkdə sənətkarlar daha çox cəmiyyətə və ətraf mühitin qorunmasında necə iştirak edə biləcəkləri barədə imkanlardan danışmışdır.
Tədbir çərçivəsində keçirilən dəyirmi masada iştirakçılar mövzu ətrafında maraqlı fikirlərini paylaşmış, layihənin işçi qrupu tərəfindən iştirakçıları maraqlandıran suallar cavablandırılmışdır. Tədbir cənub bölgəsini təmsil edən sənətkarların əl işlərindən ibarət sərgi ilə yekunlaşmışdır. Sərgidə Azərbaycan xalq sənət növlərinin, xüsusilə dünyada analoqu olmayan miniatür xalçaların nümayişi, Masallı misgərlərinin, Lənkəran həsirçilərinin əl işləri tədbir iştirakçıları tərəfindən maraqla qarşılanmışdır.
Qeyd edək ki, sözügedən layihə cari ilin iyul – sentyabr aylarını əhatə etməklə 2 regionda keçirilir və növbəti tədbir Şəki şəhərində təşkil olunacaqdır. Layihənin sonunda Bakı şəhərində regionlardan olan sənətkarlar, ekspert və qonaqların iştirakı ilə "Sənətkarlıqdan sosial sahibkarlığa” adlı sərgi-konfrans tədbirinin təşkili nəzərdə tutulub. Təşkilatın fəaliyyəti və gördüyü işlər barədə bu linkdən əlavə məlumat əldə etmək olar: www.facebook.com/amiss.achci.azerbaijan
Azərbaycan Mədəni İrs Sənətkarlığına Dəstək və Kreativ Sənaye
İctimai Birliyinin Mətbuat xidməti
Xəbərdən istifadə edərkən istinad etmək vacibdir.
