Azərbaycanda film industriyası günü-gündən inkişaf edir. Maraqlı ekran əsərləri, düşündürücü mövzuları əhatə edən filmlər ərsəyə gətirilir. Sözsüz ki, peşəkar aktyorlarımız da az deyil. Sumqayıtlı aktyor Ruslan Sabirli ilə söhbətimiz də elə məhz yaradıcılıq zərurətindən formalaşdı. "Serhed.info” xəbər portal həmin müsahibəni oxuculara təqdim edir:
– Düzü, tamaşaçı ekranda vә sәhnәdә xarakterik kişi obrazı axtarır. Siz dә әsl tapıntısınız. Ruslan bәy, karyeranızı lazım olduğu sәviyyәdә hesab edirsinizmi?
– Komplimentiniz üçün təşəkkür edirəm. Əgər həqiqətən belə düşünə bilən insanlar varsa, bu məni xoşbəxt edir, daha da ilhamlandırır. Çünki, bir sənətçi üçün kənardan olan müsbət rəylərdən, verilən dəyərdən, diqqətdən və alqışdan qözəl bir şey ola bilməz. Karyeramı lazım olduğu səviyyədə hesab etmirəm, əfsuslar olsun ki… Müəyyən vaxt və mərhələ gəlib yetişir və sən anlayırsan ki, artıq burada edə biləcəyini etmisən. Daha çoxunu etmək üçün, daha böyük qab lazımdır. Daha miqyaslı ölkələrdə daha böyük nailiyyətlər əldə edə bilərsən. Aktyor üçün isə yaşının üzərinə gələn hər bir il, hətta bir gün çox önəmlidir. Yaşlandıqca faktura dəyişir, sənin oynaya biləcəyin rolların spektri dəyişir.
– Etiraf edәk ki, gundәmdә peşәkarlar az, hәvәskarlar isә çoxdur. Biz bu hәvәskarları peşәkara necә çevirәk?
– Tək həvəsli olmaqla deyil, əgər həmin həvəsi olan insanların istedadı varsa, demək ki, onların üzərində işləyib professionala çevirmək lazımdır. Mən pozitiv yanaşmağa çalışıram. Məsələn, kino məktəbi yaratmışıq, bir sıra istedadlı gəncləri toplayıb onlara dərslər keçdik və onlar məzun oldular. Gözəl göstəriciləri oldu, bəziləri seriallarda çəkildilər. Biri Türkiyədə aktyorluğa qəbul olundu, digəri isə London film məktəbində təhsilini davam etdirdi. Ən əsası, istedadın varsa, sonra onun üzərində işləyib peşəkarlığa gətirib çıxarmalısan. Biz də belə gənclərə dəstək olmaq məqsədilə etdik bu layihəni və uğurlu nəticələrlə qarşılaşdıq. Pis odur ki, istedadın yoxdur və ya öz üzərində işləmirsən…

– Niyә bizim cәmiyyәtdә belә bir fikir formalaşıb ki, aktyor kasıbdır?
– Maraqlıdır… Bilmirəm düzü, yəqin bu həqiqətən belədir. Düzü, teatr aktyoru olmadığım üçün bu barədə bir söz deyə bilməyəcəyəm. Lakin, mən kinoaktyor olduğum üçün beş baş rol oynamışam və şükürlər olsun ki, qonorarım yaxşı olub.
– Elә bir obraz varmı ki, siz hәlә dә o rolun tәklifini gözlәyirsiniz?
– Hər bir aktyorun arzuladığı rol var şübhəsiz… Həmişə açıq söyləmişəm, "James Bond” tipli rollar oynamaq arzusundayam. Qismətdə varsa, o da olacaq yəqin. Şükür ki, kino sahəmiz günü-gündən inkişaf edir və bu sahədə ciddi mənada proqres göz qabağındadır. Mürəkkəb filmlər mərhələsi də gəlib çatacaq…
– Niyә bizdә müharibә janrında çәkilmiş filmlәr bir az pafoslu, tәsәlliverici alınır?
– Əslində kinoda hər şey ssenaridən başlayır və çox önəmli yer tutur. İcazə verin sizinlə bu barədə razılaşmayım. Məsələn, yaxın günlərdə dostum, tanınmış rejissor Elxan Cəfərov "Yarımçıq Xatirələr” adlı filminin diskini mənə hədiyyə etdi. Premyerada iştirak edə bilməmişdim. Hamı tərifləsə də, baxmaq qismət olmamışdı. Lakin baxdıqdan sonra həqiqətən gözəl bir iş olduğunu gördüm. Başda rejissor Elxan Cəfərov, Nadir Mehdiyev olmaqla həmin filmin komandasını təbrik edirəm. Sizə də tövsiyə edirəm, mütləq bu filmə baxın. Fikriniz dəyişəcək…
– Bu gün hamı "pul, pul" deyә haray qoparır. Әvvәlki dönәmin aktyorlarının heç bir o qәdәr qazancı yox idi, amma sәnәtkar idilәr…
– Bilirsiniz, əvvəlki dönəmlə hazırkı dönəmi bu aspektdən müqayisə etmək düzgün olmazdı. İndi başqa cəmiyyət idarəetmə üsulunda yaşayırıq. Əvvəl aktyor bəlkə də az pul alırdı, ancaq bilirdi ki, işsiz, evsiz qalmayacaq. Nəinki incəsənət, ümumiyyətlə bütün sahələrdə çalışan insanların müəyyən təminatları var idi. İndi isə bu təminatı yalnız özün formalaşdırmalısan və özünə güvənməlisən. Bu səbəbdən də öz üzərində çox çalışmalısan və çox işləməlisən ki, ailəni, doğmalarını dolandıra biləsən. Özünə həyat qurub, ev-eşik sahibi olasan…
– Ruslan bәy, hәyatınızı afişaya bәnzәtsәk, әsas rәng hansı olar?
– Mənim rənglərim əlvandır! Qırmızı, sarı və s…